Sos màndigos de s’Istitutu Alberghieru “Don Deodato Meloni” de Aristanis ant a èssere protagonistas in una sèrie de initziativas in sos mercados aristanesos e provintziales de Campagna Amica.
Su progetu cheret presentare a sos consumadores màndigos saboridos fatos cun sos produtos tìpicos de custa istajone. Unu percursu gastronòmicu-culturale articuladu e indiritzadu a un’impreu informadu de sos produtos.
Protagonistas sunt sos pitzocos de sos cursos formativos de s’Istitutu Alberghieru aristanesu, capitanados dae sa dotzente de Coghina Giuseppina Armas, chi ant a realizare propostas noas e creativas pro pònnere in evidèntzia sos produtos a chilòmetru zero de sos mercados rurales: dae sos produtos de s’ortu a sos ligùmenes, dae sos agrùmenes a sa pulenta e a sos durches, cun retzetas de sa traditzione e retzetas noas.
A onni apuntamentu b’at a àere carchi iscola invitada, dae s’iscola de s’infàntzia a s’iscola segundària, e in su percursu gastronòmicu las at a agiuare sa nutritzionista Giulia Mugheddu.
S’at a dare cara in manera particulare a s’ambiente: ispetantis chi s’assàgiant sos màndigos ant a èssere propostos e ispiegados sos materiales ecològicos e bio degradàbiles, cun su patrotzìniu de sa Dita Romano Bio Solution.
Su primu apuntamentu fiat oe 15 de nadale a sas 10,30 in su Mercadu Campagna Amica de sa pratza de Santu Martine in Aristanis cun unu de sos produtos prus tìpicos de s’atòngiu e de s’ierru: sos ligùmenes che su fasolu tundu (su “cìxiri”), sa lentìgia e su pisu.
Sa classe 3°A de Coghina e carchi istudiante de sas classes 5°E Sala e Bèndida e 4°G Acoglièntzia turìstica s’ant ocupare de coghinare, presentare e servire.
S’initziativa at a sighire in sos sàbados de ghennàrgiu in su mercadu ammuntadu de Campagna Amica (carrera de sos Artesanos in Aristanis), cun apuntamentos dedicados a àteros produtos tìpicos de custa istajone: càule, fenugru e cartzofa ispinosa.
In freàrgiu, sa giòbia de tzìpulas, semper in su Mercadu Santu Martine, ant a fàghere de protagonistas sos durches de sa traditzione: tzìpulas e padres frissos. In martzu s’at a fàghere sa festa de sos agrùmenes e in abrile sa festa de sa fràgula in su Mercadu Campagna Amica de carrera Matteotti in Ilartzi.
S’apuntamentu finale at a èssere in maju in su Mercadu Santu Martine. Totu sas retzetas e sas immàgines de sos eventos ant a èssere documentadas e postas in sa pàgina sòcial “I piatti del mercato”, comente unu diàriu de sas atividades fatas.
“Est una proposta chi cheret sutaliniare s’importàntzia de pònnere in mesa produtos de istajone, cando sa coghina sighit su cursu de sas coltivatziones – narat su diretore provintziale Coldiretti Emanuele Spanò – e in ue sas cosas traditzionales andant paris cun sas cosas noas”.
“Sa collaboratzione cun professores e istudiantes de s’Istitutu Alberghieru est unu valore in prus pro sos produtos nostros – ponet in evidèntzia su presidente provintziale Coldiretti Giovanni Murru -. A pònnere in parte sos giòvanos e sas iscolas est un’investimentu pro unu cras e unu trastu importante pro amparare sas bio diversidades nostras, siat gastronòmicas siat produtivas siat culturales.”.
Pro Giuseppina Armas, dotzente de Coghina in s’Istitutu Alberghieru de Aristanis, su progetu permitit a sos pitzocos de pònnere in pràtica su chi ant imparadu e de si pònnere in relatzione cun su territòriu. “Est un’ocasione bona meda pro si pònnere in relatzione cun su mundu de sas impresas e cun s’istajonalidade de sas produtziones – ispiegat Armas – e finas pro mustrare a sos consumadores màndigos noos e diversos”.
(GF.P.)
