Sa bidda de Masuddas s’agatat in Marmidda e su territòriu suo est parte de su Parcu Regionale de Monte Arci, logu de bellesa naturalìstica e de interessu mannu pro sas caraterìsticas geològicas.
In Masuddas si podent visitare duos museos dedicados a s’Istòria Naturale e a sas Iscièntzias naturales: Su GeoMuseu Monte Arci e su Museu Aquilegia.
Su primu est unu museu mineralògicu e paleontològicu dedicadu a Stefano Incani, in ue est posta in mustra una colletzione de minerales e 1800 fòssiles chi contant s’istòria naturale de custu logu, un’istòria antiga de 20 milliones de annos a como, de cando su Monte Arci fiat unu vulcanu. Su museu est aprontadu in un’ex cumbentu de su de XVII sèculos in ue b’est fintzas una colletzione de istàtuas de linna (sèculos XV-XIX). Dae su 2011, in su museu òperat su Tzentru de Educatzione Ambientale e a sa Sustenibilidade Masuddas – Parte Montis (CEAS) in ue traballant consulentes cun formatzione tècnicu-iscientìfica e umanìstica e cun esperièntzia didàtica e museale. Est de importu visitare su museu ca contat, a manera iscientìfica, s’istòria geològica de sa Sardigna e fintzas de sa formatzione geològica de àteros giassos de su mundu.
Pro informatziones:
Telèfono: 0783 3991122 389 1777100
Posta eletrònica: coopilchiostro@tiscali.it
Situ web: www.polomusealemasullas.it/geomuseo-monte-arci
Su Museu Aquilegia est dedicadu a s’evolutzione geològica e biològica de sa Terra. Sos fòssiles e sos minerales espostos contant sas èpocas e sas mudaduras chi at tentu s’ìsula sarda in 2,5 milliardos de annos, fintzas de comente e in ue est como sa Sardigna.
In su Museu est espostu su fòssile de anfìbiu prus antigu de Itàlia: su Apateon, chi 250 milliones de annos a como biviat in s’oru de s’abba de unu lagu de s’ìsula.
Su Museu organizat percursos de interesse geològicu, faunìsticu, botànicu o paesagìsticu in su Parcu Geomineràriu Istòricu e Ambientale de sa Sardigna, fintzas tenende in contu sas esigèntzias diferentes e sas dificultade de sos chi partètzipant.
Pro informatziones:
Telèfono: 3333544271 – 3201184545
Posta eletrònica: info@museoaquilegia.org - didattica.museoaquilegia@gmail.com
Situ web: www.polomusealemasullas.it - www.museoaquilegia.org
Facebook: it-it.facebook.com/museonaturalistico.aquilegia
Ambos sos museos organizant laboratòrios didàticos, fintzas pro sas iscolas, e vìsitas guidadas.
Su Museu "I CAVALIERI DELLE COLLINE"
Su Museu “I cavalieri delle colline” contat s’istòria de s’aristocratzia rurale de Masuddas e de Parte Montis, chi faghiat parte de sa nobiltade in Sardigna.
Sa vìsita a su museu incomintzat cun s’istòria sarda, dae su perìodu giudicale a s’època sabàuda, cunsiderende su raportu de sa nobiltade cun s’istòria isulana; est contadu s’aspetu amministrativu e giuditziàriu de custu territòriu, su raportu intre sos nòbiles e sa Crèsia, comente biviat sa gente ùmile de sas biddas. Una setzione est dedicada a s’istòria de sas famìllias de custu logu chi teniant tìtulu nobiliare.
In su museu si podent ammirare òperas artìsticas de valore mannu, armas e documentos chi fiant de sos nòbiles locales, bestimentas antigas torradas a fàghere, cartas e libros antigos, ainas antigas e meda àteras cosas.
Ddoe est fintzas una sala didàtica in ue si podent fàghere chircas cun ainas informàticas modernas.
Pro informatziones:
Posta eletrònica: coopilchiostro@tiscali.it
Situ web: www.icavalieridellecolline.it
Facebook: www.facebook.com/icavalieridellecolline
Twitter: twitter.com/MuseoCavColline
(MM)X
