Su 20 de santandria de su 1989 s’Assemblea de sas Natziones Unidas at aprovadu sa Cunventzione pro sos diritos de sos pipios e de sos pitzocheddos, unu documentu de importu mannu chi cunsìderat giai sos pipios e sas pipias comente sugetos chi tenent diritos tziviles, sotziales, polìticos, culturales e econòmicos. Ogni annu in custa data, si tzèlebrat sa Die internatzionale pro sos diritos de sos pipios e de sos pitzocheddos ma giai in su 1954, pro sa prima borta est istada istituida sa Die internatzionale de s’Infàntzia. In antis de sa Cunventzione s’ONU, in su 1959, aiat aprovadu sa Decraratzione de sos diritos de su pipiu.
Sa Cunventzione est unu documentu de importu mannu chi ponet in craru ca totus tenent su dovere, s’òbligu de amparare sos diritos de sos pitzinneddos/as e de sos pitzocheddos/as.
Ancora a dies de oe, milliones e milliones de pipios e pipias bivent in povertade, non tenent ite papare, non si podent curare, bivent in sa gherra, non podent andare a iscola, depent traballare e traballare comente iscraos e sentza peruna seguresa, sas pipias in logos meda ddas faghent cojuare e ancora pitzinneddas tenent fìgios.
Fintzas in paisos isvilupados, comente s’Itàlia, sos pipios chi non tenent su netzessàriu pro bìvere sunt semper de prus, aumentant sos pipios pòberos e sos chi non tenent a disponimentu sos servìtzios de s’istrutzione, de assistèntzia e culturales.
(MM)
