Sa comunidadi de Orgòsolo fueddat in sardu cun percentualis chi lompint a su 98%: est po custu chi at a arriciri su prèmiu Ondras, unu arreconnoscimentu po is chi si batint po amparai is lìnguas de minoria in Europa.
Su sardu difati est sparessendi a manera tropu lestra fintzas in is biddas de su tzentru de s'ìsula; is famìllias sunt lassendi andai sa lìngua sarda po fueddai in italianu feti.
Po fortuna peroa sighint a esìstiri territòrius e biddas, cumenti a Orgòsolo, chi non ponint menti a custa arrègula. Difati in Orgòsolo, sa lìngua sarda fait parti de sa vida de ònnia dii e sighit a èssiri fueddada in calisisiat cuntestu formali e informali, de is mannu e de is prus piticus.
Fait fintzas a nai ca prus su cuntestu si fait formali e prus is bividoris de Orgòsolo tenint sa cumpetèntzia po imperai unu sardu prus fini.
Una chirca de pagu tempus a oi, narat ca in is atòbius in famìllia, in su bixinau, tra amigus s'impreu de s'italianu est limitau a su 3% e ddu chistionant su prus piciocheddus chi tenint prus pagu de 24 annus.
