In Aristanis torrat su Cabudanni Aristanesu, prenu de apuntamentos de arte, religione, ispetàculu, mùsica e isport.
Su programma l’at deliberadu sa Giunta Sanna, a pustis de sa proposta de s’assessore a sa Cultura, Turismu e Ispetàculu Luca Faedda.
“Sighende s’àndala de sa mègius traditzione aristanesa proponimus unu calendàriu ricu de eventos e de apuntamentos pro totu sos gustos – ispiegat su sìndigu Massimiliano Sanna -. Sas festas pro Nostra Signora de su Remèdiu (chi ocannu faghet sos 70 annos de s’incoronatzione) e pro Santa Rughe, ma finas pro Santu Efes e Santu Micheli, sunt sos momentos prus importantes de su cabudanni de Aristanis. Sunt duas festas chi ponent paris sas manifestatziones tziviles e religiosas e sa comunidade de Aristanis bi tenet un’afetu particulare. Ma su Cabudanni Aristanesu est importante dae semper pro s cantidade e variedade de sos eventos chi proponet”.
“Cun su Cabudanni Aristanesu punnamus a crèschere s’istajone de istiu, dende a turistas e residentes paritzos apuntamentos cullegados a sa traditzione e a sa fide religiosa ma finas eventos isportivos, musicales e culturales – sutalìniat s’assessore Luca Faedda -. Si sa festa de su Remèdiu e sa de Santa Rughe mandant a in antis una traditzione antiga ponende in evidèntzia s’ànima prus cuada de sa tzitade, àteros apuntamentos ant a assegurare ispetàculu e divertimentu. In mesu de custos mi praghet a mentovare s’eventu de su 24 de cabudanni: “Amana, suoni tra terra e cielo”. At a èssere una produtzione musicale originale chi, in prus de propònnere mùsica bona, cheret pònnere in evidèntzia sa Turre de Marianu. Giangi Cappai, DJ e musitzista, at a seletzionare branos musicales, at a sonare sa tastiera eletrònica, e at a èssere acumpangiadu dae tres arcos chi ant a aunire mùsica eletrònica e mùsica clàssica. Sos musitzistas s’ant a esibire dae s’ùrtimu pranu de sa Turre de Marianu, a iscurigantinu pro tènnere profetu dae sa lughe particulare. Sas immàgines de sa prestatzione las ant a trasmìtere dae “maxi-ischermos” postos a pees de sa turre e a pustis las ant a pònnere in su web”.
“In su cartellone, curadu dae su Comune paris cun sa Fundatzione Aristanis, sa Pro Loco e tantos assòtzios e privados, sunt in evidèntzia sos apuntamentos isportivos, dae su torneu internatzionale de pallacanestro cun sa Dinamo Sassari a sos torneos de tennis, de botzas, a su Opens water de Turre Manna a su tziclismu (coordinados dae s’Assessoradu a s’Isport), ma finas su Festival del Gusto promòvidu dae Confesercenti e Slow Food paris cun s’Assessoradu a sas Atividades Produtivas – sighit s’assessore Faedda -. A dolu mannu ocannu non faghet a organizare in su Foro boàriu de pratza Pintus sos apuntamentos traditzionales de sa festa tzivile de Santa Rughe ca b’at traballos in cursu. Non mudant sos apuntamentos religiosos chi rispetant sa traditzione, imbetzes sos festegiamentos tziviles (un’omàgiu a Fabrizio de Andrè e unu Fèstival de mùsica sarda) s’ant a fàghere in pratza de sa Sea”.
Su programma cumpletu si podet lèghere in su situ de su Comune de Aristanis (https://www.comune.oristano.it/it/novita/news/Il-Settembre-Oristanese-tra-cultura-fede-tradizione-sport-e-spettacolo/)
(GF.P.)
