Su 13 de nadale in Aristanis si festat a Santa Lughia, patrona de su Grèmiu de sos Mastros de Muru chi est una de sas istitutziones prus antigas de sa tzitade.
Sa die est comintzada cun sa missa de sas 8 e mesa. A sas 10 at mòvidu sa protzessione dae sa cresiedda chi b’est intre carrera Parpaglia e carrera Lamarmora, in sa zona prus antiga de sa tzitade. Sa màgine de Santa Lughia, posta subra de unu mezu de sos Vìgiles de su Fogu e beneita dae don Enrico Porcedda in antis de mòvere, l’ant acumpangiada sas fèminas in bestire traditzionale. Sa mùsica de su sonete at allegradu su corteu.
Ant sighidu sa protzessione su sìndigu de Aristanis Massimiliano Sanna, sos carabineris e sa politzia locale. A pustis, su corteu est torradu a sa cresiedda, pro sa missa solenne de sas 11.
Un’àtera missa s’at a fàghere custu sero a sas 5 (h 17,00). A sas 8 (h 20,00), imbetzes, b’at in programma una rassigna musicale cun sos coros Res Nova de Terraba ghiadu dae su mastru Dante Muscas, Santa Barbara de Solanas ghiadu dae su mastru Tino Mirai e Por Cor de Aristanis ghiadu dae sa mastra Sara Careddu.
Cras, mèrcuris 14 de nadale, est in programma una missa a sas 6 de sero (h 18,00) pro ammentare sos sòtzios de su Grèmiu chi sunt mortos.
(GF.P.)
