In sa biddighedda de Tzèpara, fratzione de su Comune de Abas, dae su 2002, b’est su Museu de sos Giogos Traditzionale de sa Sardigna chi tenet sa punna de ddos fàghere a connòschere e de ddos torrare a impreare ma fintzas de dare valore a sa memòria istòrica de s’ìsula sarda. Su Museu tenet ses salas e unu laboratòriu didàticu in ue si podet imparare comente si faghent sos giogos antigos de linna, canna, roba o àteros materiales.
S’idea de su museu naschet dae unu progetu fatu dae s’Iscola Mèdia de Abas in sos annos dae su 1993 a su 1996; unu progetu coordinadu dae prof. Nando Cossu, espertu de traditziones populares sardas, cun sa consulèntzia iscientìfica de s’Istitutu de Istòria de sas Traditziones Populares de sa Facultade de Lìteras e Filosofia de s’Universidade de Casteddu. Su progetu at postu paris sos dischentes, sas famìllias issoro, s’iscola chi ant fatu prus de 200 giogos sardos antigos chi oe sunt in mustra in su museu. B’at pipias de tzàpulu, caddos e fusiles de canna, carriteddos, bardùfulas e àteros meda fatos cun materiales naturales (cannas, curcurigas, linna, ardone…) o cun materiales chi, imbetzes de ddos fuliare a s’àliga, in sos giogos tenent un’impreu nou (botos, cantos de roba, tupones,…).
Su museu oferit atividades diferentes:
- in prus de sa mustra permanente, chi cherende si podet visitare cun una ghia chi ispiegat comente sunt fatos sos giogos, comente si usant, contat contos e istòrias de sos giogos etotu,
- cuncordat mustras cun materiales regionales, natzionales e fintzas internatzionales,
- organizat, fintzas pro sas iscolas, laboratòrios didàticos in ue s’imparant sas tècnicas de costrutzione de sos giogos ma fintzas a cunfrontare sas diferèntzias, sos impreos, sos significados chi sos pipios, ma fintzas sos mannos, non connoschent prus.
Informatziones:
Indiritzu: bia San Simeone, 9 - 09091 Abas – localidade Tzèpara
Telèfono 0783 998072 - 340 6742512
Posta eletrònica: museodelgiocattolosardegna@gmail.com
Situ web: www.museogiocattolosardegna.it
Facebook: www.facebook.com/Museo-Giocattolo-Tradizionale
(MM)
