In su sartu de Iscanu, a 400 metros in pitzu de su livellu de su mare, in sa regione de su Monteferru b’est unu parcu naturalìsticu dedicadu a sos pugiones, in ue bivent prus de dughentos esemplares de animales, su prus sunt esòticos, chi sos amantiosos de sa natura podent osservare e s’ispantare de sa bellesa de sos colores, de comente si movent, de comente apant agatadu su logu giustu fintzas pro sighire sa riprodutzione. Difatis, sa punna printzipale de su Parcu de sos pugiones est de no ispèrdere ratzas raras chi bivende in libertade tenent, a dies de oe, dificultades meda.
In suta de chercos, èlighes, eucalitos e pirastros ant collocadu:
- gàbbias mannas in ue fintzas pugiones mannos, comente paones, marabù, ibis sacros, gru podent bolare sentza perìgulu perunu. Sa gàbbia prus manna est de prus de 2000 metros cuadros;
- gàbbia in ue bi sunt papagallos, pigas, mangones (gente arrùbia) e medas àteros;
- bartzas mannas in ue nadant tzignos biancos e nieddos, testùines, cocas de ratzas diferentes, anades e unu muntone de àteras ratzas de pugiones;
- acorros mannos cun molenteddos sardos, cadditos de sa Giara, emù, crabolos.
B’est fintzas unu giardinu de prantas grassas.
Su Parcu, mannu prus o mancu 20.000 metros cuadros, est a 3 chilòmetros dae sa bidda, in s’istrada provintziale 21 andende cara a Sune, in localidade Codiles.
Si podet visitare dae su mese de abrile fintzas a santugaine, dae su martis a sa domìniga in custos oràrios 09:30-13:00 e 15:30-18:00. Est un’istrutura privada e est mègius a tzirriare in antis de sa vìsita pro ischire de su billete e de comente si faghet sa visita ca si podet visitare fintzas cun sa guida.
Pro informatziones:
Telèfono: 0785-32582 / 340-4970705 / 327 4499957
Posta eletrònica: info@parcodegliuccelli.it
Situ web: www.parcodegliuccelli.it
Facebook: it-it.facebook.com/il-parco-degli-uccelli
(MM)
