Su Trenu de sa Memòria eris sero est imbàtidu a Aristanis.
A l’isetare bi fiant su sìndigu Massimiliano Sanna cun su gonfalone de sa tzitade, su prefetu Fabrizio Stelo, sas autoridades, su coro de sa Politzia locale “I cantori di Eleonora” cun su mastru Nicola Lentis e gente meda.
Custu trenu istòricu at mòvidu dae Trieste su 6 de santugaine pro imbàtere a Roma su 4 de santandria a pustis biagiadu pro prus de 5 mìgia chilòmetros, intrende in totu sos capoluogos de regione e in sas tzitades prus mannas chi no ant retzidu sa vìsita de su trenu in su 1921.
Su corteu ispetziale – chi in su 1921 at portadu in biàgiu dae Aquilea a Roma su “Mìlite Non Connotu”, cussu mortu seberadu dae Maria Bergamas intre 11 mortos italianos sena identificare, at torradu a rugrare s’Itàlia pro ammentare totu sos mortos chi cun su sacrifìtziu issoro ant agiuadu a fraigare s’unidade natzionale e su cuntzetu de Pàtria.
Su Ministeru de sa Difesa, paris cun su Grupu Ferrovias de s’Istadu italianu - cun s’agiudu de sa Fundatzione FS e de s’Istrutura de Missione pro valorizare sos anniversàrios natzionales e sa partetzipatzione de sas generatziones noas – torrat a onorare s’anniversàriu de su trasportu de su Mìlite Non Connotu cun un’itineràriu nou in rispetu de unu provedimentu parlamentare de ocannu passadu.
Su biàgiu de su Trenu de sa Memòria est in 17 firmadas e 100 oras de biàgiu, e passat in 730 istatziones, ponende in movimentu 270 ferrovieris.
(GF.P.)
