Sa binnenna (vendemmia)
A binnennai, bolit nai a ndi segai s'àxina agoa de àiri traballau sa bìngia a totu annu. A movi de custu momentu su mustu chi ndi bessit s'at a mudai in binu.
Sa binnenna no est sceti unu momentu de traballu de su mundu agrìculu, ma una traditzioni, unu rituali presenti in totus is regionis de Itàlia. Tenint unu valori stòricu e antropològicu, stichiu in sa cundivisioni sotziali e in su territòriu.
Po ndi scrufiri una àxina bella po fai binu, tocat a tènniri is matas e sa terra giusta, paris cun is cunditzionis climàticas e cun sa manera adata de traballai sa bìngia. Su logu prus adatau po pònniri una bìngia est cussu ancà ddui est unu ierru non fridu meda. Sa mata de s'àxina nci podit pònniri finas a cuatru annus po èssiri pronta prima de dda pòdiri binnennai.
Candu est chi tocat a binnennai? Candu s'àxina est pronta po fai su binu chi si bolit produsi. Est una cosa chi mudat segundu sa schèscia de àxina. Naraus ca nosu in Sardigna acostumaus a binnennai a movi de su mesi de cabudanni e finas prus o mancu a su mesi de ladàmini.
S'anatza (vinacce)
S'anatza est su croxu de s'àxina paris cun su pisu, cun arrastus de mustu e binu ammesturaus. Est a nai ca est su chi abarrat de unu pibioni de àxina agoa de nd'ai bogau sa prupa.
Su pisu de s'àxina (vinacciolo)
Su sèmini de s'àxina est arricu meda de polifenolus e de ollus. Est duncas pretziosus po produsi sustàntzias antiossidantis e ollu chi podit èssiri impreau in àmbitu alimentari.
Si usat fintzas in sa produsidura de su binu, casi ca ddi donat caraterìsticas particularis.
