Giòbia 22 de cabudanni 2022 a sas 06 de merie, in sa Sala de su Tzentru Servìtzios Culturales UNLA de Aristanis presentant su libru
Passava in bicicletta sotto la mia finestra de Maria Teresa Casu
Cun s’Autora nde faeddat Elisabetta Cau
Su libru – S’istòria de custu romanzu est contada cun prus o mancu 500 lìteras chi pobiddu e pobidda s’ant iscritu in sos sete annos chi sa segunda gherra mundiale ddos at tentos separados. Issa lassat s’Etiòpia in su mese de maju de su 1940, a su pobiddu sos inglesos ddu faghent presoneri in su mese de martzu 1941. Sas lìteras bogant a pìgiu su chi in sos annos ant sufridu ambos duos. Sa gherra at a sinnare a manera forte a issos e a su fìgiu issoro, nàschidu in Àfrica e abarradu cun sa mama. Su pitzinnu at a bìvere cun issa dies chi no at a ismentigare e chi dd’ant a sinnare pro totu sa vida.
Sa letura, cussigiada a totus e de prus a sos giòvanos, agiudat a pensare a sos dannos chi sas gherras faghent a totus e a totu.
Maria Teresa Casu est nàschida in Casteddu in su 1952; su babbu est gadduresu e sa mama aristanesa. Est dotzente de matemàtica in pensione. Custu est su de duos romanzos chi pùblicat, su primu est istadu SOGNO D’AFRICA, publicadu in su mese de freàrgiu de su 2017.
S’iscritura, passione betza sua, est diventada s’ocupatzione sua preferida sentza però discuidare sas àteras chi tenet, comente sa letura, sa mùsica e sas pinturas "naïf" in ue pintat sa natura pura e ìnnida.
(MM)