Làmpadas est su de ses meses de s’annu. Pro custu mese, custu nùmene bi fiat giai in su Medioevu e, comente at iscritu su linguista M.L. Wagner, in s’Àfrica setentrionale, in ue si tzelebraiant festas cun lughes, fogos in antis in onore de sa dea Tzèrere, a pustis in onore de Santu Juanni.
Fiat usàntzia antiga cussa de allumare, su 24 de làmpadas, fogulones dedicados a su Sole, cunsideradu unu deus, in ocasione de su solstìtziu: lampas, dies lampadarum. Cun su fogu, sìmbulu de purificatzione, si pediat s’amparu divinu pro sos frutos de sa terra. Giai sos Romanos antigos in custu mese, su mese de s’incùngia, tzelebraiant cun ritos Tzèrere, sa dea de sas coltivatziones e de sa fertilidade, chi – cun una frache chircaiat sa fìgia Prosèrpina, sa dea de su trigu, furada dae Plutone e leada in su regnu buju de sos mortos. Tzèrere inchieta e addolorada non faghet ogrire sas matas e sos frores e sos òmines sufrint pro sa carestia; cando torrat a agatare sa fìgia, totu torrat a frorire e a dare frutos ma Plutone at cuncordadu una trampa e Prosèrpina pro unos cantos meses, ogni annu, depet torrare in su regnu de sos mortos e a s’oras sa Terra torra frita, nuda e sentza frutos. Gasi sa mitologia ispiegat sa nàschida de sas istajones.
A pustis sa religione cristiana, su 24 de làmpadas at postu sa ricurrèntzia de sa nàschida de Santu Juanni, su precursore de Gesùs, a sos ses meses pretzisos dae sa ricurrèntzia de sa nàschida de su Fìgiu de Deus. E fintzas cun Santu Juanni e Cristos sighit sa simbologia de sa lughe, de sas dies mannas e piticas. In Sardigna, ma non in Sardigna ebbia, tenimus s’usàntzia de allumare fogulones pròpiu in custa data e a ddu brincare e a si fàghere compares de frores acanta de custu fogu.
(MM)
