Su nòmini ndi arribat de su calendàriu bizantinu e est lòmpiu, paris cun àteras cosas de cussa cultura, fintzas a oi.
Su fatu de tzèrriai su mesi de settembre, cabudanni, est acapiau prusatotu a su mundu de sa massaria. Difati est in custu tempus chi cumentzat s'annu de massaria, chi si torrant a fai is cuntratus po is terras e cussus cun is pastoris e is giorronaderis, chi si fait sa binenna, chi si fait fintzas s 'arregorta in calincunu casu.
In sa cultura sarda duncas, est a cabudanni chi cumentzat s'annu e non in gennarxu. In cabudanni si fadiat su bandu po ndi boddiri sa figu morisca, in sa simana de Nostra Sennora de su Rimèdiu.
Su de noi mesis de s'annu ddu narant cabudanni fintzas in sa carta De Logu, de su 1392, scrita cumenti scideus in sardu.
Agataus difati scritu in sa carta de sa reina Eleonora:
- "Item ordinamus qui nexuna persone non deppiat nen pocat pone fogu infini ad passadu sa festa de Santa Maria, qui est a dies octo de capidanni".
Cun custu fueddus si proibiat de abruxai is istuas inantis de s'8 de cabudanni, casi ca podiat èssiri perigullosu po non nci fuiri su fogu.
