Finas a su 15 de nadale s’at a pòdere contribuire a sa candidadura de su monasteru de Santa Chiara de Aristanis comente “Logu de su Coro”. Pro como s’istrutura religiosa est a su de 147 postos, cun 596 votos, in sa campagna natzionale de su Fondo per l’Ambiente Italialiano (FAI).
Cun custa campagna, su FAI sustenet e faghet protagonista sa gente chi in cussos logos bi bivet, los istimat e los podet sarvare, finas megiorende.los, pro su bene de totus. Sos tzitadinos tenent sa possibilidade de agiuare custa trasformatzione de sos logos chi sunt patrimòniu istòricu, artìsticu e naturale de su Paisu, in ue sas comunidades locales si connoschent e si identìficant, e chi diant pòdere agiuare s’isvilupu.
In custu ispìritu, pro amparare e valorizare sos logos prus caros e pro dare parte a sos àteros de sa bellesa e de s’incantu de cussos logos, su comitadu “Amici del Monastero” de Aristanis at propostu sa candidadura de su monasteru intituladu a Santa Chiara.
Su progetu de FAI est in duas fases: in sos annos pari si faghet unu tzensimentu dedicadu a su patrimòniu artìsticu, culturale e paesagìsticu italianu. Dae su 12 de maju a su 15 de nadale si podet podet votare e fàghere votare sos logos chi s’istimant e chi si diant chèrrere amparare, valorizare e fàghere connòschere.
Sos primos tres classificados e sos binchidores de sa graduatòria ispetziale (dedicada a unu tema diversu in onni tzensimentu) ant a retzire un’agiudu econòmicu faghende unu progetu cuncretu de presentare a FAI.
In sos annos dìspari, imbetzes, s’aberit su bandu “Logos de su Coro / Luoghi del Cuore”, e totu sos logos chi ant tentu nessi 2500 votos in su tzensimentu podent candidare unu progetu e pedire a FAI una targa pro ammentare su resurtadu otentu, de pònnere in su situ o in su monumentu mentovadu.
Sos “Amigos de su Monasteru” si sunt aunidos in unu comitadu ispontàneu pro regalare custu reconnoschimentu a sas Clarissas urbanistas (sas mòngias de clausura chi dae sèculos sunt custodes de su monasteru de Santa Chiara), ma finas a sa tzitade de Aristanis e a sa provìntzia intrea.
“Amus giai tentu votos meda e s’impignu at dadu resurtados bonos – narant sos sòtzios de su comitadu -. A dies de oe s’istrutura religiosa est sa candidadura prus importante in tzitade e in provìntzia; in sa classìfica est in una positzione bona meda: in sos primos 3 in Sardigna e in sos primos 150 a livellu natzionale. Unu traguardu de prestìgiu mannu chi però non bastat ancora a imbàtere a s’iscopu”.
Pro custa resone, su comitadu sighit s’atividade e invitat a totus a votare, firmende pro sa candidadura de su monasteru, pro chi si potzat superare sa làcana de sas 2.500 firmas e nch’artziare in graduatòria.
Comente si votat? Si podet votare in duas maneras:
1) cumpilende su mòdulu cun nùmene, sambenadu, comune de residèntzia, indiritzu de posta eletrònica e firma autògrafa e mandende.lu iscansionadu a s’indiritzu realmonastero@gmail.com. Su comitadu, a pustis controllada s’atendibilidade, l’at a inoltrare a su FAI. Su mòdulu cheret iscritu in manera crara, chi si legat bene.
2) intrende in sa pàgina de su monasteru in su situ de FAI (https://fondoambiente.it/luoghi/monastero-santa-chiara?ldc) finas cun su QRcode chi est in sa locandina. A pustis tocat a si registrare (sena pagare nudda) in “myFay” e a votare incarchende in su pulsante “Vota con 1 clic”. A si registrare in “myFai” (chi est àtera cosa dae sa registratzione a FAI) est importante ca mustrat sa seriedade de sa votatzione: si podet votare una borta ebbia e non faghet a intrare cun profilos farsos.
Su monasteru de Santa Chiara naschet comente cunventu in su 1343, a òpera de su giùighe Pedru III de Arbarè. Est fraigadu subra de una crèsia prus antiga, dedicada a Santu Bissente. In s’àbside e in una pedra subra de sa gianna de intrada si podent ancora bìere sos emblemas de sos giùighes.
In sas pinturas de muru fatas in su 1300 bi nd’at una chi narant chi siat su giùighe Marianu IV chi ponet su primu fìgiu (giùighe Ugone III) suta de sa protetzione de sa Santa. B’at finas un’iscritzione de su 1348 chi ammentat chi in ie b’ant interradu sa mugere de su giùighe Pedru III, Costanza de Saluzzo.
Dae cando su cunventu est istadu fraigadu, sos giùighes de Arbarè b’ant tentu semper unu raportu particulare e in s’archìviu b’at documentos importantes meda, sigillos de abbadissas e registros contàbiles de sos sèculos XV e XVI. Sa vida de su monasteru est sighida in sos sèculos finas a oe pro more de sa presèntzia de sas mòngias Clarissas urbanistas, cosa rara in su panorama italianu e europeu.
(GF.P.)
