Su nènnere est una traditzione sarda, ma fintzas de àteras regiones de s’Itàlia comente sa Calàbria e sa Sitzìlia, acapiada a sos rituales de Chida Santa e de pretzisu de sa Giòbia Santa.
Ma ite est su nènnere e comente si cuncordat?
In Carèsima si ponet su trigu in pratos o istèrgios, carcu carcu chi ammuntet bene bene su fundu in ue si ponet istupa o pagu pagu de terra o fintzas carchi pìgiu de tela o roba a manera chi abarret semper unu pagu infustu; si lassat a su buju e si ponet in unu giassu non fritu meda. A pustis de unas cantas die su trigu at a nàschere carcu carcu (comente si narat: a nènnere!) e in colore grogu craru ca est abarradu inserradu e non at bidu lughe. In Chida Santa su nènnere est prontu, si mudat cun carchi frore e/o nastru e sa Giòbia Santa si giughet a crèsia pro mudare sos artare e sos sepurcros: sas capellas in ue abarrat su Santìssimu sa Chenàbura Santa.
Su nènnere est una traditzione antiga chi connoschiant sos grecos e àteros pòpulos e chi ddi narant ‘sos giardinos de Adone’. In Sardigna dda diant àere batida sos fenìtzios.
Una parte de sos antropòlogos ispiegant Adone comente unu deus chi morit pro torrare in vida – e figuras comente Adone podimus nàrrere ca esistit in ogni cultura – ma àteros non sunt de acordu no essende possìbile, segundu issos, chi unu deus mòrgiat e, duncas, chi torret in vida. In s’antighidade Adone fiat tzelebradu in ocasiones meda. Sa mitologia contat ca custu deus, bellu meda, chi rapresentat sa natura sana e bella, dd’ant ochidu sos sirbones, chi rapresentant su tempus malu de s’ierru; e comente su deus torrat in vida a pustis de sa morte, in beranu sa natura si nde torrat a ischidare a pustis de sa ‘morte de s’ierru’. Su Cristianèsimu, chi pròpiu in beranu, ogni annu, tzèlebrat in Chida Santa sa passione e sa morte de su Fìgiu de Deus (e Deus etotu) chi sa die de Pasca Manna sa torrada sua in vida pro sarvare sos òmines, est arribadu a pustis de sa mitologia clàssica.
Sa vida, sa natura chi morit e torrat a nàschere, torrat in vida. Istòrias e rituales chi torrant e sighint…
A primu su nènnere si cuncordaiat fintzas in su mese de làmpadas pro santu Juanni (precursore de Cristos), in unas cantas bidda fintzas pro Mesaustu ma fintzas pro mudare sas istàtuas de sos Santos pro sas festas mannas; in custa ocasione si faghiat fintzas cun sèmene de linu o de lentìgia.
(MM)
