Su prefetu de Aristanis Fabrizio Stelo at iscritu a sos sìndigos de s’Aristanesu, a su cummissàriu istraordinàriu de sa Provìntzia Massimo Torrente e a su dirigente de s’Ufìtizu iscolàsticu territoriale pro pònnere in evidèntzia su perìgulu chi podent causare sos edifìtzios iscolàsticos betzos e male tentos contu.
“Tocat a dare atentu a sas oportunidades chi oferit su Pranu natzionale de ripresa e de resistèntzia –at ammentadu su prefetu a sos amministradores -. Cheret fatu unu rilevamentu de sos immòbiles pro verificare s’agibilidade, cumprèndere ite dificultades b’at e pònnere in èssere sas mesuras de seguresa adatas pro chi non b’apat perìgulu pro sos istudiantes e pro chie totu intrat a iscola”.
“Pedo a totus chi s’impignent cantu prus podent – finit Stelo -. S’iscola est su logu seguru pro definitzione e non si podet trasformare in logu de disacatos pro neghe de su discòidu e de sa paga atentzione”.
(GF.P.)