Su progetu Maristanis est andende a in antis.
Sa Giunta comunale de Aristanis, a pustis chi s’assessore a s’Ambiente Maria Bonària Zedda at fatu sa proposta, at aviadu sas atividades preliminares pro creare su Parcu Naturale Regionale de sas Terras de Abba de sa zona de Aristanis.
“Su progetu Maristanis est unu progetu de cooperatzione internatzionale pro definire unu modellu de gestione integrada de sos logos de abba e de sos logos costerinos de su Golfu de Aristanis. Su progetu est finantziadu cun sa Fundatzione MAVA e est coordinadu dae sa Fundatzione MEDSEA paris cun s’Àrea Marina Custodida “Penìsula de su Sinis – Ìsula de Malu Bentu” – ispiegat su sìndigu Massimiliano Sanna -. Maristanis est creschende paris cun àteros tres progetos co-finantziados dae MAVA in Tunisia, Montenegro e Albania e tenet s’iscopu de tutelare e megiorare sa gestione de sos logos de abba de importàntzia internatzionale (sitos Ramsar), collocados in su territòriu de mare e de costa de su Golfu de Aristanis, de sa Penìsula de su Sinis e de s’ Àrea Marina Custodida “Penìsula de su Sinis – Ìsula de Malu Bentu”, chi ponet in parte sos Comunes de Santeru, Arborea, Arbus, Aristanis, Arriora, Crabas, Gùspini, Prammas, Santa Justa e Terraba.
In sos meses colados sos sìndigos de custas biddas, su presidente de su Cunsòrtziu de Bonìfica de sa zona de Aristanis, su presidente de sa Provìntzia de Aristanis e s’assessore regionale de sa Difesa de s’Ambiente ant sigladu su Cuntratu de sos Logos Ùmidos de mare e de costa de sa zona de Aristanis paris cun su Programma de sas Cosas de Fàghere. A pustis at aderidu finas su Comune de Nurachi.
“Como intramus in sa fase de realizatzione – ponet in craru s’assessore a s’Ambiente Maria Bonària Zedda -. Sa Fundatzione MEDSEA, chi tenet sa Segreteria Tècnica, at a pensare a su protzessu de partetzipatzione cun s’iscopu de presentare su Cuntratu e su Pranu de sas Cosas de Fàghere aviende una fase de ascurtu e de coinvolgimentu de sos protagonistas de su territòriu. Sa punna finale est de fàghere nàschere unu Parcu chi at a pòdere assegurare sa gestione aunida de totu sos ecosistemas de sas abbas de passàgiu garantende, bidu chi tenent importàntzia internatzionale e comunitària, su mantenimentu e s’avaloramentu de sas risorsas naturales, ambientales, istòricas e culturales, s’impreu sotziale, sa promotzione de sa chirca iscientìfica e de sa didàtica ambientale e finas s’isvilupu sustenìbile de sas atividades econòmicas, in antis de totu cussas traditzionales, ìticas, agrìculas, zootècnicas, artesanales e turìsticas e su megioru de sos paesàgios”.
“Dae sas esperièntzias fatas dae àtere in Itàlia amus bidu chi a creare unu Parcu est a fàghere nàschere oportunidades econòmicas noas pro sas comunidades locales de cussos territòrios – agiunghet Maria Bonària Zedda -. Dae inoghe a pagu tempus sunt in programma sas atividades chi sighint: aprontadura de istùdios ispetzialìsticos de tipu ambientale, sotziològicu, antropològicu, sòtziu-econòmicu e àteras atividades chi podent agiuare a connòschere su territòriu; atividade de animatzione e sensibilizatzione, finas faghende atopos cun sa gente e cun sas istitutziones interessadas; presentatzione de atividades bona fatas in àteros logos, finas ponende in mesu àteros gestores de logos de mare tutelados”.
(GF.P.)
