Su 29 de abrile 2022 in S’Ulumedu (àula de su Cussìgiu in cursu Kennedy n° 26, a sas 17,30) s’at a fàghere un’atopu intituladu “Su sardu in iscola”, destinadu a famìllias, mastros e istudiantes ma abertu a totus.
S’atopu, aparitzadu dae s’Assemblea Natzionale Sarda (ANS) paris cun su Comune de s’Ulumedu, at a tratare temas de importu mannu: sa trasmissione intergeneratzionale de su sardu e de sas àteras limbas sardas de minoria; su profetu chi dat su faeddare duas o prus limbas; sas leges pro las amparare; s’esperièntzia de iscolas chi impreant su sardu in sa didàtica dae tantos annos...
Custu eventu est nàschidu pro more de s’impignu de tanta gente: prof. Dino Manca delegadu de s’Universidade de Tàtari pro sas Limbas e Culturas de Sardigna, dot. Francesco Ballone dotzente de aligheresu in UNISS, dot. Giovanni Marras dirigente de s’Istitutu cumprensivu de Pèrfugas, s’assòtziu Spaciada sa Bregùngia e s’assòtziu Corona de Logu chi sunt impignados in una polìtica linguìstica ativa in sas famìllias e in sas amministratziones locales.
S’atopu est su primu de una sèrie de eventos temàticos organizados dae ANS, chi ispiegat: “S’idea nostra est de informare mastros e genitores chi s’insegnamentu in tantas limba est unu profetu pro sos pitzinnos. S’isperàntzia est chi, connoschende s’esperièntzia de iscolas chi giai lu àplicant, àteras iscolas chèrgiant fàghere sa matessi esperièntzia”.
Maria Vittoria Migaleddu, esperta de psicolinguìstica e sòtzia de ANS, agiunghet: “Su disìgiu nostru diat èssere chi nascat unu movimentu de mastros e istudiantes chi pedat s’inserimentu de sas limbas sardas de minoria in sos curriculum iscolàsticos, ca a nàschere in unu logu in ue si faeddant tantas limba est unu profetu, no unu dannu”.
Chie tenet praghere de tènnere custa esperièntzia in bidda sua podet cuntatare ANS iscriende a sa mail info@assembleasarda.org.
Su programma de s’atopu si podet abbaidare in su situ https://www.assembleasarda.org/altre-attivita-sa-die/il-sardo-nella-scuola/.
Custu sero Maria Vittoria Migaleddu at a faeddare de s’atopu in Radio Cuore (97.00 MHz, www.radiocuore.net) a sas 14,40, 19,40 e 23,40.
(GF.P.)
