Martis 13 de nadale a sas 4 e mesa de sero (h 16,30) in Palatzu Arcais (cursu Umbertu I) si inàugurat “Il tornio di via Figoli – L’arte dei ceramisti”.
Finas a su 7 de ghennàrgiu sa mustra-mercadu at a èssere aberta onni die in oràriu 9,30-13,30 e 16,00-20,00, foras de su 22, 23 e 24 de nadale chi at a abèrrere cun oràriu sighidu.
“Su Comune cunfirmat s’impignu comente tzitade de traditzione tzeramista antiga e pro Nadale faghet un’espositzione bella chi dat onore a sas manos abilidadosas de sos congiolàrgios nostros – ispiegat su sìndigu Massimiliano Sanna -. Dae paritzos annos semus impignados in custa cosa pro fàghere connòschere una particularidade chi apartenet a sa traditzione e a su patrimòniu culturale de Aristanis”.
“Su tòrrinu de carrera Fìgoli oramai est un’apuntamentu traditzionale, pro Aristanis, un’ocasione pro ammirare sas òperas de sos congiolàrgios nostros e pro agatare regalos originales – ispiegat s’assessora a sas Atividades Produtivas Rossana Fozzi -. S’eventu, chi ocannu imbatet a sa de XIV editziones, oferit unu percursu espositivu e de mustra-mercadu dedicadu a sa tzeràmica, in Palatzu Arcais in su cursu Umberto I, paris cun Confartigianato e cun sos congiolàrgios locales. Sos traballos bellos de tzeràmica de sos artesanos nostros sunt un’idea bella pro fàghere regalos finas in sas festas de ocannu. Pro sos momentos prus importantes (Nadale, Annu Nou e festa de sos Tres Res) s’at a fàghere un’espositzione a tema”.
“Tocat a torrare gràtzias a sos collaboradores de sa manifestatzione pro s’agiudu chi ant dadu: sa Provìntzia de Aristanis ca at dadu sos locales importantes de su Palatzu Arcais; su litzeu artìsticu Carlo Contini ca at imbellidu sa mustra cun tzeràmicas istòricas fatas dae sos alunnos dae sos Annos Setanta a dies de oe; su Fablab de Aristanis ca at agiuadu dare originalidade e pratitzidade a sos telajos de espositzione postos a disponimentu dae sas 6 aziendas artesanas chi esistint in tzitade; sa CNA de Aristanis pro su cullegamentu pretziosu cun sas impresas – agiunghet Sandro Paderi, presidente de Confartigianato -. Onni artesanu at a espònnere su mègius de sa produtzione sua, chi ponet in evidèntzia sa vitalidade de su setore e sa capatzidade de pònnere in su mercadu artìculos chi rapresentant sa traditzione aristanesa e sa capatzidade de fàghere cosas noas chi tenent fìgios nostros”.
(GF.P.)
