S'Assòtziu Turìsticu Pro Loco de Tonara at publicau su bandu e invitat a pigai parti a sa de duas editzionis de su cuncursu de poesia e de contus in lìngua sarda “Tiu Pera Sulis – Sonos e versos de memòria”, intitulau a su poeta tonaresu Tiu Pera Sulis, aintru de sa Rassinna Culturali e Fierìstica dedicada a is pitiolus “Intranno in sonu” chi s'at a fai su 10 e 11 de austu.
Su prèmiu literàriu est partziu in 2 setzionis:
-
sa setzioni A – poesia in lìngua sarda in rima o in versus lìberus. Sa setzioni est aberta a totu is variedadis linguìsticas de Sardigna. Si podint intregai sceti poesias a tema s'identidadi, sinnus, sonus e silèntzius de s'Ìsula. S'ammitit una poesia sceti, mai imprentada prima o premiada in àterus cuncursus o publicada in cali si siat forma. Acontessendi, serbit annota a spiegai fueddus o frasis idiomàticas. Is poesias non depint sartai i 60 versus.
-
sa setzioni B – contus in lìngua sarda. Sa setzioni est aberta a totu is variedadis linguìsticas de Sardigna. Si podint intregai sceti contus curtzus a tema s'identidadi, sinnus, sonus e is silèntzius de s'Ìsula. S'ammitit unu contu sceti, mai imprentau prima o premiau in àterus cuncursus o publicau in cali si siat forma. Acontessendi, serbit annota a spiegai fueddus o frasis idiomàticas. Is contus non depint sartai 4 pàginas de 25 rigas de 50 batutas.
S'Assòtziu at a premiai a dinai is primus tres de is duas setzionis.
Podint pigai parti a su cuncursu totu cantus e sena de pagai nudda. Is traballus depint arribai aintru de su 20 de su mesi de làmpadas de su 2024 a sa Segreteria de su Prèmiu literàriu. At a balli su timbru postali. Si podit pigai parti a totu e duas setzionis.
Is premiatzionis ddas ant a fai s'11 de austu de su 2024 apustis ai giudicau sa Giuria totu is traballus arribaus.
Po ndi sciri de prus ligi su bandu intreu in su giassu de s'Assòtziu www.prolocotonara.it
