S'Assòtziu culturali “Coro Polifonico Femminile” de Tonara, su Comunu de Tonara e sa Fundatzioni de su “Banco di Sardegna” cuncordant su Cuncursu Literàriu dedicau a Peppinu Mereu e invitant a totus a ndi pigai parti.
Su Cuncursu est partziu in 5 setzionis:
Setzioni A) Poesia in lìngua sarda in rima - S'amitit una poesia sceti mai imprentada o premiada in àterus cuncursus o mai publicada, in cali si siat variedadi de su sardu.
Setzioni B) Poesia in lìngua sarda, a versus lìberus – S'amitit una poesia sceti mai imprentada o premiada in àterus cuncursus o mai publicada, in gadduresu, logudoresu o in cali si siat variedadi de su sardu.
Setzioni C) Iscrie unu contu – Po is piciocheddus de is scolas (troparas de discentis o classis).
Setzioni D) Piciocheddus e piciocus de 15 a is 30 annus de edadi cun poesia in rima o a versus lìberus. Aberta a totu is variedadis linguìsticas de sa Sardigna.
Setzioni E) Poesia e mùsica - S'ant a podi intregai arrangiamentus musicalis de versus in lìngua sarda, cantzonis “rock” e “pop”, cumponimentus in “rap”, cumponimentus polifònicus o a tenori o in àtera forma populari o traditzionali. Funt agradèssius assentamentus musicalis de versus originalis o pigaus de is poesias de su poeta Mereu.
S'Assòtziu Culturali at a donai prèmius a dinai.
Po pigai parti a su cuncursu non si pagat nudda. S'amitint sceti testus de autoris chi non siant arresurtaus bincidoris in s'editzioni passada de su Cuncursu literàriu “Po Peppinu”.
Non s'ant a acetai scritus giai premiaus in àteras initziativas o cuncursus o chi ddus apant publicaus in cali si siat forma.
A chi bolit pigai parti depit fai arribai su traballu suu aintru e sena de sartai su 21 de su mesi de ladàmini de su 2024 (s'at a castiai su timbru postali).
Sa premiatzioni s'at a fai su 20 de onnisanti de su 2024.
Po ndi sciri de prus:
Telèfonu e “Whatsapp”: 3336740851
“Facebook”: Coro Polifonico Femminile “Tonara”
Indiritzu de posta eletrònica: corofem@hotmail.com
