Terraba, tzitade de su binu, aberit oe su programma de ‘Calici sotto le stelle/ Càlighes suta sos isteddos’ chi at a sighire in àteras biddas de totu sa Sardigna e at a acabbare in Sossu su 12 de austu. Fintzas pro ocannu, s’Amministratzione comunale e sa Pro loco de Terraba ant cuncordadu unas cantas propostas culturales e de mùsica chi ant a èssere in sa pratza de sa Catedrale dae sas 08.00 de merie fintzas a mesunote. S’ant a pòdere abbaidare sos isteddos cun su telescòpiu, ascurtare sa mùsica de sa chiterra acùstica de sos musitzistas terrabesos Lilly and El e in su mentres, paghende unu billete, s’at a pòdere tastare Bovale e àteras calidades de binu de bator cantinas terrabesas: s’azienda agrìcula Lotta, sa Cantina de su Bovale, s’azienda agrìcula Melis, sa cantina Su Cuppoi. Cun un’àteru billete s’ant a pòdere tastare sos màndigos cuncordados dae sas aziendas Ces.Tall e Niedditas.
Pro sos chi sunt interessados a abbaidare sos isteddos: s’osservatzione at incomintzare a sas 10.00 de note, sos telescòpios a disponimentu ant a èssere tres, sos voluntàrios de s’Assòtziu astròfilos sardos ant a ghiare s’osservatzione e ant a apentare cun informatziones e inditos in contu de pianetas, costellatziones e sistema solare sos chi isetant su turnu pro su telescòpiu.
Fintzas chi durat sa manifestatzione sas butegas de sa bidda ant a èssere abertas.
In sa provìntzia de Aristanis, ‘Calici sotto le stelle/ Càlighes suta sos isteddos’ at a sighire in Bosa su 9 de austu.
S’idea de ‘Calici sotto le stelle/ Càlighes suta sos isteddos’, comente manifestatzione enogastronòmica, dd’ant tenta s’assòtziu natzionale Città del vino e su Movimentu turismu de su binu.
(MM)
