Sa ASL de Aristanis sighit a dare atentu a cale si siat cosa chi potzat èssere unu sinnale de sa presèntzia de sa Callentura de su Nilu in su territòriu de sa provìntzia. Duncas, est istadu afortiadu su controllu e s’osservatzione de sos casos suspetos in sos òmines ma fintzas in sos pugiones e in sos caddos. Pro bìere si su virus est presente o mancu, sunt istadas postas tràpulas pro cassare bobbois e sighit s’atividade de informatzione pro s’amparare dae sa tzìntzula e de su controllu de su sàmbene de sas donatziones.
Su virus passat a s’òmine cando est piculadu dae sa tzìntzula chi at piculadu in antis un’animale giai malàidu.
Sa ASL de Aristanis, su Tzentru Antinsetti de sa Provìntzia e s’Istitutu Zooprofilàticu Isperimentale de sa Sardigna, giai dae su 2011 cando su virus est istadu atzapadu pro sa prima borta in sa provìntzia de Aristanis, sunt traballende paris pro sa preventzione, s’amparu e sa gherra a sa Callentura de su Nilu.
Su prus de sas atividades sunt de cumpetèntzia de su Servìtziu de Sanidade Animale e de cussu de Igiene Pùblica de sa ASL e de su Tzentru trasfusionale de s’ispidale Santu Martinu, chi controllant a manera regulare su sàmbene donadu, fintzas pro sa seguresa de sos malàidos chi ddu retzint.
A pustis chi in Aristanis una persones est resurtada cun sa Callentura de su Nilu, su Sìndigu de sa tzitade at fatu un’ordinàntzia pro chi in su territòriu si fatzant prus controllos e preventzione.
Sighit s’atividade de sensibilizatzione semper prus atenta dae parte de sa ASL chi, cun s’agiudu de sos dotores de famìllia, de sos pediatras, de sos poliambulatòrios e de sas comunidades sòtziu-assistentziales, est informende sos tzitadinos de comente si amparare dae sa tzìntzula. In su situ internet de sa ASL de Aristanis est a disponimentu su materiale chi ispiegat de sa maladia (ancora no esistit unu vatzinu e nemmancu una terapia) e de comente chircare de isperdere sa tzìntzula.
Est de importu sinnalare a sos servìtzios veterinàrios de sa ASL si s’agatant pugiones mortos, chi diant pòdere èssere istados malàidos. Su nùmeru de su telèfono de su servìtziu est 0783.317767.
(MM)
