S’ispidale San Martino de Aristanis est torra in emergèntzia. Dae su chi s’est cumpresu, sa diretzione sanitària at blocadu pro unu pagu sos ricòveros in su repartu de Meighina, bidu chi non b’at prus dotores. In servìtziu bi nd’at abarradu chimbe ebbia, ca àteros bator mancant, e sunt tropu pagos pro parare fronte a su nùmeru de malàidos ospitados (60, e b’at finas malàidos de Covid).
Carchi malàidu est ospitadu finas in àteros repartos, ca non bastant sos letos.
Duncas in su repartu de Meighina podent ricoverare ebbia malàidos graves meda.
Giai dae sas dies passadas b’aiat istadu dificultades, semper ca b’aiat pagos dotores, ma como sa situatzione est semper prus dificultosa, a su puntu de firmare sos ricòveros.
A calicunu de sos malàidos prus pagu graves nche lu sunt leende a s’ispidale de Bosa, àteros los lassant in su Prontu Sucursu in ue b’at barellas finas in sos passaditzos, àteros nche los ghiant a domo, arrischende chi peorent e torrent dies a pustis. E non si podet fàghere afidamentu in su repartu de Meighina de s’ispidale de Ilartzi: no est prus operativu dae tempus meda, b’at duos dotores ebbia e pro su prus sunt impignados in atividades de ambulatòriu.
(GF.P.)
