Su progetu pro sa “pista ciclabile” chi diat dèvere cullegare su Foro Boàrio a Sa Rodia est firmu. Sa Giunta comunale noa de Aristanis b’at agatadu dificultades meda, comintzende dae su fatu chi su percursu – comente est sestadu – nche diat colare in su cortile de s’iscola materna de carrera Satta, e nche diat fàghere fora prus de chentu parchègios peri sa tzitade. Una de sas tantas carreras chi diant pèrdere sos parchègios est carrera Lombardia.
S’ispesa totale de s’òpera aiat sobradu su mesu millione de èuros, dinari chi si nde podiat bogare pro su 60% dae sa disponibilidade de su Comune e pro su 40% dae unu finantziamentu ministeriale passadu dae sa Regione. Como tocat de cumprèndere ite fine at a fàghere cussu dinari.
“Semus dialoghende pro bìere si b’apat possibilidade de torrare a elaborare su progetu – at ispiegadu s’assessore a s’Urbanìstica, a sa Viabilidade e a sos Parchègios Ivano Cuccu -. S’amministratzione devet cumprèndere sos bisòngios de sa gente e a pustis si pònnere in òpera sena lassare sas cosas a sa sorte. Est dificultosu a pensare a unu percursu pro bitzicletas chi curret in mesu de carreras astrintas e in mesu de màchinas”.
Su percursu, cambiadu tantas bortas, l’aiant agiornadu finas su beranu coladu, tenende contu de sas osservatziones fatas dae s’Assessoradu regionale de sos Traballos pùblicos. “Comente est como – at agiuntu Cuccu – non faghet a nde tènnere contu, b’at problemas de onni tipu. Finas ca non s’est bidu mai unu percursu pro bitzicletas chi nche colet a intro de su cortile de un’iscola, aberende un’àidu in intrada e unu in essida. Pro custa resone su progetu pro como est firmu”.
“Amus a pedire a sa Regione si b’apat possibilidade de pònnere cussu dinari pro àteros progetos cullegados a sa viabilidade. M’agradat a andare in bitzicleta – at finidu s’assessore – ma non mi nde potzo impipare de sos paesanos mios. Totu sa comunidade devet istare bene”.
(GF.P.)
