Torrat s'eventu "famìlliachiligit" su progetu chi promovit sa letura e cuncordau dae s'assòtziu Lughenè, intregau a is pipias e a is pipius finas a 6 annus de edadi e a is famìllias e a is chi traballant cun is pipius e is pipias.
Lòmpiu a sa de duas editzionis, su progetu bolit promovi sa letura, cun atividadis de animatzioni, atòbius de formatzioni, ammostas e donus de lìburus.
Su calendàriu de su programma movit de su mesi de martzu e sighit finas a su mesi de onniasantu, cun prus de 100 atòbius chi interessant is biddas de Atzara, Brebì,Busache,Cullieri,Fordongianus,Miris,Neoneli,Nughedu Santa Itòria ,Samugheo,Santu Lussurzu,Tramatza,Ula, Biddobrana e Tzeddiani.
Famìlliachiligit si pratzit in unas cantu propostas. Tra totus si scerat “Pesai letoris", chi est pensau po asilus nidu, scolas de s'infàntzia e bibilotecas de is territòrius interessaus cun prus de 50 atòbius de atividadis de laboratòriu e de giogu. Su progetu previdit finas atòbius de formatzioni intregaus a babbus e mammas, a is educadoris professionalis, a is maistas e maistus e a is operadoris culturalis. S'est pensau finas a unu momentu po presentai is generis de letura difarentis intregaus a edadis diversas.
Est previdida finas una ammosta “S’arti de contai immàginis”, unu eventu chi aunit sa promotzioni de sa letura a s'aviamentu a s'arti, pensau a posta po is prus pitius.
Unu momentu de importu mannu at à èssiri sa nàscida e publicatzioni de su “Patu 0-6” po sa promotzioni da sa letura, scritu de una truma de volontàrius ancà ddui at professionistas de setoris difarentis e chi ndi benint de logus diversus. Custu paperi, si sperat chi siat apustis aprovau dae su Tzentru po su Lìburu e sa Letura e spainau in is canalis istitutzionalis de is entis chi pigant parti a su progetu e in is logus de sa cultura (scolas, bibliotecas, tzentrus culturalis).
Famìlliachiligit est cuncordau dae s'assòtziu culturali Lughenè, cun s'agiudu de su Tzentru de su Lìburu e de sa Letura e de is comunus de Atzara, Brebì,Busache,Cullieri,Fordongianus,Miris,Neoneli,Nughedu Santa Itòria ,Samugheo,Santu Lussurzu,Tramatza,Ula, Biddobrana e e Tzeddiani e cun su sustènniu de Bohem Press Italia, Sinnos Editrice, Unioni de is comunus de su Barigadu, Unioni de is comunus de is Fenìcius e de is Istitutus Scolàsticus de Samugheo e de Santu Lussurzu.
Po àterus informus e minudus asuba a su programma si pedeus de consultai su giassu in lìnia www.lughene.com/famigliachelegge o de cuntatai su nùmeru de telèfunu 329 4773857.
