Festival de sa butàriga
Ocannu puru sa bidda de Crabas at apariciau s'editzioni nùmeru 2024 de su Festival de sa Butàriga, prevididu po su 14 e su 15 de su mesi de cabudanni.
Paris cun is protagonistas de sa coxina natzionali e internatzionali, a su festival ant a pigai parti finas is piciocas e piciocus de s'istitutu alberghieru de Aristanis.
Medas ant a èssiri is atòbius chi s'ant a fai in custu acabu de cida in Crabas.
Sa Pratza Don Sturzo at a acùlliri is ristoradoris de su territòriu chi ant a apariciai cosa de papai fata cun sa butàriga. A coxinai cun custu produtu de ecellèntzia ddui ant a èssiri finas coxineris de importu, de unus cantu ristorantis sardus: Marina Ravarotto de su restoranti ChiaroScuro de Casteddu, Pierluigi Fais de su restoranti Josto de Casteddu, Laura Sechi de su Vitanova sèmpiri de Casteddu e Gianluca Chessa de sa Saletta de s'Alighera.
Àterus òspitis de importu ant a èssiri su giornalista gastronòmicu Luca Iaccarino, sa giornalista Lara De Luna, sa sperta de gastronomia e viàgius Luciana Squadrilli, Pietro Catzola, su chef de su Cuirinali e de is Presidentis de sa Repùblica e su giornalista e diretori de Spirito Autoctono Francesco Bruno Fadda.
Domìnigu su 15 de su mesi de cabudanni su Chef Salvatore Camedda meri de domu e su su Chef famadu Carlo Cracco, ant a interpretai a sa manera insoru, is retzetas fatas cun sa butàriga.
Me in is diis de su Festival de su mangianu a su merì s'at a podi abbisitai sa laguna e is traditzionis suas: difati in s'interis de “Alla scoperta della Laguna e della Peschiera” cun is operadoris de s'àrea Marina Protetta Penisola de su Sinis – Isola de Malu Entu s'ant a podi fai bessidas in canoa, a pei e passilladas cun birdwatching, abbisitas ghiadas aintru de sa Peschiera Pontis, ancà nascit sa butàriga e dda produint gràtzias a su Cunsòrtziu Pontis.
In is diis de su Festival s'at a podi abbisitai fintzas su Mercau de is ecellèntzias de su territòriu e assistiri a momentus de animatzioni po pipus e mannus.
Sàbudu su 14 de su mesi de cabudanni s'at a incingiai su Museu de Mar’e Pontis, uno de is logus sìmbulu de Crabas chi aberit a sa genti cun unus cantu eventus.
In sa Prataza Eleonora sèmpiri sàbudu s'at a cuncordai "Sa Butega de su Sinis", ancà s'ant a podi tastai e comporai is produtus de su logu. Is prus piticheddus ant a podi pigai parti a unus cantu laboratòrius cuncordaus de sa Fundatzioni Mont’e Prama, is mannus invecis ant a podi gosai de su billetu smenguau po intrai a su museu tzìvicu e a àterus situs archeòlogicus e po comporai is billetus po tastai sa cosa de papai.
Domìnigu Fabrizio Fenu de sa Gelateria I Fenu at a presentai a su pùblicu su gelau a sa butàriga, una faina chi ddis at fatu binci su Gelau Festival de Amsterdam e chi at a èssiri cumbidau a sa genti po si ddus fai tastai.
Prus a tradu sa giornalista Lara De Luna at a arrexonai cun su chef de su Cuirinali Pietro Catzola, chi at a contai stòrias e crosidadis de sa coxina de su Palatzu de su Cuirinali.
A serrai custa giornada arrica de fatus e personàgius, at a èssiri su chef de fama mondiali Carlo Cracco chi at a ammostai a su pùblicu is secretus de unu MasterChef beru.
Una àtera cosa bella meda chi s'at a podi fai est sa bessida in mongolfiera, chi at a movi de sa Pratza Stagno obrescendi o a su scurigadroxu, po gosai de da bellesa de totu su Sinis biu de s'artu.
