Su Cunsòrtziu “Due Giare”, presentat paris cun sa sotziedadi Nabui, s’editzioni noba de su 2Giare EXPO.
S’eventu s’at a fai sàbudu su 22 de su mesi de làmpadas de su 2024 e ocannu sa bidda sceberada po ddu aculliri est Nureci. Sa temàtica de s’eventu de ocannu at a èssiri “Terra Selvaggia”. Casi ca si podit nai ca sa Marmidda est una terra sintzilla, arrica de bidiversidadi, de saboris verus, de cosa de papai chi est abarrada agualis a is retzetas de su tempus passau.
Medas ant a èssiri is novas de custa editzioni. Sa manifestatzioni s’at a fai movendi de su merì e gràtzias a una collaboratzioni manna tra is amministratzionis comunalis e prusatotu cun is pro loco e is assòtzius localis chi ant a èssiri s’ànima vera de su 2GIAREXPO.
Narat su presidenti de su Cunsòrtziu Lino Zedda: “Su tema de ocannu arremonat is caraterìsticas de su territòriu de sa Marmidda; innoi sa natura est abarrada sintzera e s’òmini dd’at mudada pagu e nudda. Ma su nòmini Terra Selvaggia pertocat fintzas s’impìnniu fitianu de su Cunsòrtziu, de is amministratzionis e de is assòtzius in su de amparai a avalorai custa richesa naturalìstica e ambientali.
Duncas sàbudu a Nureci eis a podi tastai is saboris sintzillus de sa Marmidda. Su tzentru stòricu de sa bidda s’at a alligrai de genti, cun is portalis chi s’ant a aberri po ammostai su mellus de su sciri fai de su territòriu po su chi pertocat sa cosa de papai e sa traditzioni.
Eis a podi pigai parti a duus laboratòrius po imparai a fai su pani de saba e is pàrdulas cun is pro loco de Nureci e Sini. A movi de is seti de merì in s’arena comunali, s’ atòbiu cun Mia Canestrini, zoologa, scritora e condutora televisiva e radiofònica; at a sighiri sa tastadura a indonu de is pàrdulas.
Dae is otu de merì su momentu de prus importu de sa manifestatzioni; is assòtzius pro loco ant a cumbidai is pratus insoru assigurendi sa cosa de papai a 200 persones onniuna.
Su Cunsòrtziu at a cumbidai duas tastaduras a indonu. De sa de tres s’at a domandai una oferta.
E po acabbai sa giornada, a movi de is dexi de noti sèmpiri in s’arena comunali su spetàculu de Arrogalla. Ant a èssiri presentis finas is aziendas de su territòriu, aintru a is stand de is pro locos”.
“Cumbidaus duncas totu is sardus ma finas is turistas chu sunt in s’ìsula nosta, a benni a su 2GIAREXPO po connòsciri trexi comunidadis de custu territòriu spantosu”, narat su presidenti Lino Zedda.
