In Quartu is initziativas po avalorai e fai connòsciri su sardu, sunt stètias sèmpiri de prus in is ùrtimus annus. In su 2005 est nàsciu su prèmiu ‘Tzitadi di Quartu Sant’Aleni’, chi agoa de cincu annus s'est firmau. Immoi ndi dd'ant torrau a bogai a pillu in s'àmbitu de su progetu ‘Si ghètat custu bandu’, cun sa punna de ancorai is tzitadinus e ammanniai is oportunidadis de crèscida de is cumpetèntzias po su chi pertocat sa lìngua e sa cultura sarda.
Su prèmiu est nàsciu de una idea de s'Acadèmia de sa lìngua sarda campidanesa ONLUS, cun s'agiudu de s'Assòtziu Rimas, e cun su patrocìniu de su comunu. Sa partecipatzioni a su prèmiu ‘Tzitadi di Quartu Sant’Aleni’, sustènniu de sa retza de assòtzius chi cuncordant is eventus de s'istadi e de s'atòngiu in su progetu ‘Sì ghètat custu bandu’, est lìbera e a indonu. Su cuncursu est partziu in tres setzionis: Su Mutetu, sa Prosa, su Teatro. Ònnia cuncurrenti depit sceberai una categoria e mandai unu traballu feti in lìngua sarda. Si s'òpera est in una variedadi difarenti dae su campidanesu, iat a èssiri mellus a nci mandai sa furriadura in italianu.
Su prèmiu bessit impari a sa domanda a s'Unesco, de parti de su Lions Quartu, de arreconnòsciri su mutetu che patrimòniu materiali de s'umanidadi.
Po su bincidori de ònnia setzioni est prevididu unu prèmiu de 550 èurus.
Is traballus tocat a nci ddus mandai intra a su 10 de su mesi de idas de su 2024, a is dexi de mangianu. Sa premiatzioni est previdida in gennarxu, po sa festa de sa befana.
