Sìndigos totu paris pro sarvare s’aeroportu de S’Alighera, a pustis de su bandu pro sos bolos in continuidade territoriale, a in ue non b’at partetzipadu nemos. Eris mangianu b’at istadu un’atopu in Palatzu Sciuti in Tàtari, e a sa cramada de s’amministradore istraordinàriu de sa Provìntzia Pietro Fois b’ant rispostu amministradores locales meda, de nord e tzentru de Sardigna, finas su sìndigu de Bosa Piero Casula e su vitze sìndigu de Aristanis Luca Faedda.
S’assessore regionale de sos Trasportos Antonio Moro, presente finas issu paris cun su presidente de su Cussìgiu regionale Michele Pais, at sutaliniadu sa netzessidade de fàghere nàschere unu modellu nou de continuidade territoriale.
“Dae S’Alighera passende pro Tàtari finas a Terranoa e Madalena, e a pustis Nùgoro, Aristanis, Macumere, Tèmpiu, Portu Turre, Bosa e sìndigos meda dae totu sa Sardigna. Custu mustrat chi semus totus aunidos pro difèndere su diritu a sa mobilidade de sos sardos – at iscritu su sìndigu de S’Alighera Mario Conoci – sena diferèntzia de territòriu, sena rivalidades internas, sena divisiones polìticas chi non tenent sensu, ma cun sa cussèntzia chi sa Sardigna creschet si creschimus totus paris, e chi si si ponent in dùbbiu, oe, sos diritos de calicunu, cras podet capitare a totus”.
“Niunu de nois cheret fàghere perunu passu in segus – at finidu Conoci -. Sa Regione l’ischit chi nos tenet a costàgiu pro pretèndere e otènnere su rispetu e sa garantzia de custu diritu: sa libertade de sos sardos de si mòvere”.
Su sìndigu de Bosa Piero Franco Casula at postu in evidèntzia “s’importàntzia primària de s’aeroportu de Fertìlia (narende.li finas ‘aeroportu de Bosa’) non pro su tzentru nord ebbia, ma pro totu sa Sardigna”.
“Pro sustènnere su diritu a sa mobilidade dae Sardigna e a cara a Sardigna – at naradu Casula – finas pro s’aeroportu de S’Alighera at a èssere de importàntzia manna a non sighire sas lògicas de partidu, a mustrare unidade pro pedire a su Guvernu natzionale de sustènnere sas resones de sa Sardigna in Europa”.
“Sunt importantes meda totu sos aeroportos de s’ìsula – at cummentadu su vitze sìndigu de Aristanis Luca Faedda -. Sa mobilidade est unu diritu. Pro nois chi bivimus in Sardigna tzentrale sunt importantes in sa matessi manera sos aeroportos de Su Masu, Terranoa e Fertìlia. Oe est giustu a faeddare de rete aeroportuale sarda”.
(GF.P.)
