Su de sete meses de s’annu, chi su nùmene italianu ammentat a Giùliu Tzesare chi in custu mese fiat nàschidu, in sardu tenet unu nùmene (antzis duos nùmenes) – Trìulas o Mese de argiolas - chi ammentat unu traballu chi sos massajos faghent in custas die de s’istiu: trìulant su laore in s’argiola. Custu ammustrat comente sa limba est acapiada a sa cultura e a sa realidade de sa gente e de su logu in ue est faeddada.
Dae su faeddu trìula, dae totu su sonu e cosas chi si faghent in s’argiola, benint àteros faeddos comente:
trìulu: briga, avolotamentu o murigamentu de chistiones, cosas, pensamentos;
triulare: cheret nàrrere fintzas brigare o avolotare, murigare a manera mala sas cosas e sas chistiones;
triuleri: unu chi brigat, chi ponet trìulu o chi ponet avolotu o pesat burdellu.
E fintzas dae argiola, pro sa matessi resone, tenimus:
argiolai, argiolare: faeddare meda e de cosas de pagu contu;
argioleri: unu chi ddi agradat a faeddare meda e de cosas de pagu contu.
(MM)