Cun unu finantziamentu de 700mìgia èuros su Comune de Aristanis at a intervènnere pro amparare e megiorare su sistema de montigros de sa praja de Turre Manna.
Sa delìbera chi ponet su dinari in favore de su Comune de Aristanis l’at aprovada in sas dies coladas sa Giunta regionale a pustis de sa proposta de s’assessore a s’Ambiente Gianni Lampis.
“Pro Turre Manna bi tenimus in cantieri paritzas initziativas chi in giru de carchi annu ant a megiorare sa localidade marina – ispiegat su sìndigu Massimiliano Sanna -. Sos interventos in su lungomare e in su portigheddu ant a permìtere de fàghere òperas de servìtziu chi in sunt importantes meda in unu logu de turismu, mentres cun custu progetu amus a intervènnere de prus in sas partes chi pertocant s’ambiente. S’àrea interessada est su cordone de rena in oros de mare in su setore chi andat dae sa turre manna a villa Baldino, unu tretu de litorale urbanu chi est de importàntzia manna pro su turismu balneare”.
“A amparare sos valores ambientales e de paesàgiu in oros de mare est una de sas punnas chi tenet su Comune in sa localidade marina de Turre Manna – agiunghet s’assessore a s’Ambiente Maria Bonaria Zedda -. In sos meses colados amus pedidu a s’assessore regionale a s’Ambiente Gianni Lampis unu finantziamentu ispetzìficu pro megiorare s’ambiente e amparare su sistema de montigros de sa praja de Turre Manna. In custu setore, tenet importàntzia manna su tretu de praja a cara a su lungomare de sa bidda, pro aunire s’amparu de s’ambiente cun sos interessos (chi si podent cumprèndere) de tzitadinos, turistas e atividades turìsticas, chi diant chèrrere prus tretu pro bagnare”.
“S’interventu punnat a megiorare su sistema morfològicu e de sedimentu originàriu de sa praja pro tènnere prus istabilidade in sa rena e prus amparu dae s’erosione de su mare e dae sos undamentos – sighit s’assessora Zedda -. Sas òperas de ingegneria naturalìstica in sos montigros sunt pro agiuare a los riparare afortighende s’istabilidade in su tempus de su litorale. Sas òperas de intrada a sa praja serbint pro chi sa gente intret a praja sena perìgulu e pro minimare sos dannos fatos dae su catzigamentu de sa rena. In prus, amus a pònnere pannellos chi ispieghent sas caraterìstica ambientales de sa praja e de sos montigros e chi diant inditos pro comente amparare unu litorale de delicadesa manna”.
S’interventu previdet interventos de megioru naturalìsticu e ambientale, cun s’iscopu de afortigare sos montigros chi sunt abarrados e de riparare sos montigros chi sunt naschende, pro mesu de traballos fatos in materiale naturale biodegradàbile e impiantos de matas vegetales locales. Sunt prevìdidas, in prus, òperas pro intrare a praja comente pontìgias artziadas, dissuasores pro chi non si càtzighet sa rena in sos logos prus delicados, cartellones didàticos e signalètica informativa cun immàgine coordinada (pro esempru cun s’inditu de sas intradas a sa praja, etc.), atziones de informatzione pro difùndere sa connoschèntzia e fàghere crèschere sa cussèntzia in contu de s’amparu de sos elementos chi creant una praja.
(GF.P.)
