Dae su 10 de làmpadas a su 27 de austu in Turremanna onni chida b’at carchi eventu pro allegrare sos seros de istiu.
Su Tzentru Cummertziale Naturale de Turremanna (chi rapresentat belle totus sas atividades presentes in sa localidade marina), paris e cun s’agiudu de sos Assessorados a sas Atividades produtivas, a s’Isport, a su Turismu e Ispetàculu de su Comune de Aristanis organizat su “Turremanna Summer 2022” pro animare s’istiu de sa localidade marina cun unu programma ricu de manifestatziones.
Sa diretzione artìstica l’at a fàghere s’agentzia Applausi, chi at aprontadu eventos pro onni chida.
Si comintzat su 10 de làmpadas e si finit su 27 de austu e b’at programmas de tantos tipos, dae sa Mostra Mercadu in oros de mare (chi non podet mancare) a Patrick Abbate cun BAZ, Mike Terrana e Jen Majura de sos Evanescence, dae atividades pensadas pro disaogare sas famìllias a un’isfilada de canes a s’umorismu de sa cumpangia Lapola.
Su programma cumpletu lu podides agatare in custu link: https://www.comune.oristano.it/it/novita/eventi/evento/Torre-Grande-Summer-2022/.
(GF.P.)
