Domìniga 19 de martzu 2023 in Aristanis b’at a èssere s’initziativa “Tutti in piazza!”, promòvida dae s’Assòtziu Italianu de Persones Down (AIPD) natzionale pro festare sa die mundiale de sas persones cun sìndrome de Down chi ocannu resurtat in martis (su 21 de martzu). S’initziativa est inserida in su progetu “Non uno di meno”.
Dae sas 10 de mangianu a sa una (h 13,00), in pratza Roma, sos rapresentantes de sa sede Aipd de Aristanis ant a presentare una chirca chi mustrat sa vida e sos progetos de sa gente cun sìndrome de Down, sos servìtzios chi esistint pro issos in sos territòrios e sos servìtzios chi mancant.
A mesudie (h 12,00) sos giòvanos de sa setzione de Aristanis (Enrico Manunta, Antonello Spiga, Francesco Obinu, Fulvio Silesu, Cristiano Merella, Chiara Statzu, Lorenzo Puliga, Martina Achenza, Arianna Porru e Alessio Melis) ant a fàghere unu “flash mob”.
Sos grupos de Scout de Aristanis ant a dare una manu de agiudu a sos rapresentantes de Aipd, e b’at a àere finas bancarellas in ue s’ant a pòdere comporare cositeddas dende un’oferta lìbera.
“Su progetu est comintzadu sa prima die de nadale de ocannu passadu – narant sos de s’assòtziu – e at a finire in su mese de maju de ocannu. A pustis de su 21 de martzu, sos giòvanos ant a relatare s’esperièntzia issoro in s’Assemblea Natzionale de sos sòtzios Aipd”.
“In custas chidas sos giòvanos e sos mannos cun sìndrome de Down si sunt bidende in sas sedes Aipd issoro pro cunfrontare sas esperièntzias in unu percursu de crèschida de cussèntzia e de determinu – ispiegant sos de s’assòtziu de Aristanis -. Una borta a su mese sos operadores si cunfrontant cun su responsàbile natzionale de su progetu, Francesco Cadelano”.
Sas setziones Aipd chi partètzipant a su progetu sunt: Aipd Anzio Nettuno, Aipd Arezzo, Aipd Avellino, Aipd BAT Setzione Barletta, Aipd Belluno, Aipd Brindisi, Aipd Campobasso, Aipd setzione de Caserta, Aipd setzione de Catanzaro, Aipd Setzione de Cosenza, Aipd Castelli Romani, Aipd Gallura, Aipd Latina – Associazione Italiana Persone Down Latina, Aipd Lecce, Aipd Oristano, Aipd Onlus Potenza Associazione Italiana Persone Down, Aipd Reggio Calabria Onlus Associazione Italiana Persone Down –SBT, Aipd Sudpontino Associazione Italiana Persone Down Teramo, Aipd Termini Imerese, Aipd Venezia Mestre.
(GF.P.)
