Sa MALVASIA est iscrita, cun su nòmini “Malvasia” in su Registru natzionali de is variedadis italianas de bidi (D.M. 2575/1970) e in s'Elencu de is variedadis racumandadas in totu sa Sardigna (Reg. Cee 1250/70, D.M. 25/5/1970) cun is sinònimus de Manusia e Marmaxia. Est una bidi prantada meda in su sartu de Bosa.
SU GRILLU
Su grillu s'ammostat mesu abertu, a colori birdi e arrigau de arrùbiu. Est unu pagu piludu. Sa primu folla abarrat piluda pagu me in sa nerbiadura de sa faci de asuta e prus pagu a manu a manu chi andat sa folla afatanti.
SA FOLLA
Sa folla est orbiculari a forma de pentàgonu, a cincu lobus o a bortas a seti lobus. Su sinu petziolari (s'oru acanta de su tenaxi) est sena de dentis, abertu e a U, cun totu e duus is ladus de is orus marcaus beni de sa nerbiadura.
Sa faci de asuba de sa folla est birdi a perfilu sciatu, sena de strecaduras, bubullucas e pigmentatzionis. Is dentis funt curtzas e istrintas, a ladus paris e cucurudus. Sa faci de asuba e sa de asuta de sa folla funt lisas.
Sa folla ammostat tretus curtzus intra de is sinus cun una mannesa mesana-pitia de is àngulus intra de sa nerbiadura maista.
SU TRONI E SU PIBIONI
Su troni est a forma de piràmidi, allonghiau, po nudda tipiu ma a bortas podit essi tipiu, est a una o duas alas, de mannesa mesana-manna (392 grammus). Su pibioni est mesanu-pitiu (1,9 grammus) a forma unu pagu ellìtica, a longhiori e ladiori mesanu (cm 1,52 x 1,38). Su còrgiu est nì grussu nì fini, pruinosu, a colori birdi-grogu, mentras sa purpa est sena de colori, tostau, a sabori unu pagu aromàticu.
Sa bidi si usat po su prus po fai binu in puresa chi permitit sa fai binu D.O.C. “Malvasia di Cagliari” e “Malvasia di Bosa”.
(Pigau de su lìburu “Vitigni della Sardegna”a incuru de Gianni Nieddu, de Convisar, 2011)
