Su SEMIDANU est iscritu, cun su nòmini “SEMIDANO” e cun is sinònimus de “semidanu, mizu o mìgiu” in su Catàlogu Natzionali e in su Registru natzionali de is variedadis italianas de bidi (D.M. 2575/1970). Est in s'Elencu de is variedadis racumandadas in provìntzia de Casteddu, Aristanis e Nùgoro (Reg. Cee 1250/70).
SU GRILLU
Su grillu s'ammostat lisu o pagu piludu e a colori birdi-grogànciu. Sa forma sua est aberta in pitzus e totu is follixeddas funt piludas meda me in sa nerbiadura de sa faci de asuta.
SA FOLLA
Sa folla est a forma de pentàgonu e a cincu lobus, cun perfilu sciatu. Su sinu petziolari (s'oru acanta de su tenaxi) est a V, a bortas podit essi a U, mesu abertu, a lobus unu pagu postus s'unu asuba de s'àteru, sena de essi partziu de sa nerbiadura.
Sa faci de asuba de sa folla est unu pagu a pigmentus antociànicus movendi de su puntu petziolari finas a sa primu frucaxadura de sa nerbiadura e no ammostat strecaduras o abullucas in s'oru. Is dentis funt curtzas e istrintas, a ladus cumbessus. Sa faci de asuba est lisa, custa de asuta est a seda me in sa nerbiadura maista e aintru de is partis chi cussa ingìriat.
Sa folla ammostat tretus mesanus intra de is sinus e àngulus mannus intra de sa nerbiadura maista.
SU TRONI E SU PIBIONI
Su troni est a forma de conu truncau, a una o duas alas pagu svilupadas, est mesu serrau, a mannesa mesana (331 grammus). Su pibioni est cussu puru a mannesa mesana (2,8 grammus), a forma de ellissi a bortas de pira, a longhiori e ladiori mesanu (cm 1,71x1,55). Su còrgiu est grussu, non meda pruinosu, a colori virdi-grogu, mentras sa purpa est sena de colori, tostada e a sabori nèutru.
(Pigau de su lìburu “Vitigni della Sardegna”a incuru de Gianni Nieddu, de Convisar, 2011)
