Su pramitzu est connotu in Sardigna cun àterus nòminis puru: prama aresti, prama de Santu Pedru, prama de scovas, prama nana.
Est una prama chi abarrat bàscia, 2 o 3 metrus de artesa.
Su truncu suu est curtzu a colori trinu, po su prus ammantau de folla bècia, podit essi deretu o trotu e apillonat de asuta donendi-ndi sa forma a mola tunda a totu sa mata.
Sa folla est sèmpiri bia, a tanaxi linnosu, piludu e longu finas a 40 cm, a spina a perparti, est a 10-20 follixeddas a lantzita de 30-50 cm postas a afantallu, corriatzas e lisas a colori birdi càrrigu asuba e birdi craru asuta.
Sa folla si impreat po fai scovas e stèrgius.
Su frori fèmina fait in mata diferenti de cussa a frori mascu. Est a pannuga longa 30-40 cm a colori grogu-birdàngiu e s’aberrit in abrili-maju.
Su frutu ddi narant indàtiri, est mannu 1-3 cm a forma de ou a colori grogu chi tirat a s’arrùbiastu-colori de cafei. Cumprit in su mesi de ladàmini.
Su pilloni de sa mata, s’arraxini e s’indàtiri si papant.
Su pramitzu crescit in logu sicu, àrridu, a su soli e cun pagu àcua e in cali si siat arratza de terra, siat in logu de arroca siat in logu de arena, bastit chi non ddui siat àcua meda acarropada. Timit su frius meda e sa cilixia.
In Sardigna s’agatat po su prus a oru de mari ma finas a tretu meda de custu.
Crescit in Malu Entu puru.
