GEMUSSI – Bidda antiga, podit essi de orìgini romana chi faiat parti de su Giudicau de Arbarei in sa curadoria de Parte Montis.
S'agatàt in su sartu chi immui est de Sìmaba.
Arrutu su Giudicau de Arbarei nci dda iant posta in su 'Regnum Sardiniae'. In antis de su 1430 fiat me in is terras chi teniat in cojantza Eleonora Manrique candu s'est cojada cun Bertran Carroz e acoa fiat intrada a fai parti de sa contea de Quirra. Spèrdia custa sa bidda nci fiat passada a is Centelles. A bellu a bellu, in su sèculu afatanti, su nùmeru de is bividoris fiat calau meda finas a su 1653 candu sa pesta dda iat agiomai spèrdia in totu e is pagus abarraus nci fiant andaus a Sìmaba prima de su 1688.
GENADAS - Bidda antiga, podit essi de orìgini pùnicu-romana, faiat parti de su Giudicau de Arbarei in sa Curadoria de Parte Valenza.
S'agatàt in su sartu chi immui est de Nureci, no atesu meda de s'àtera bidda spèrdia de Valenza. Arrutu su Giudicau de Arbarei nci dda iant posta in su 'Regnum Sardiniae'. In su 1416 faiat parti de su fèudu de Giuanni Corbera chi perou no cuncordàt meda cun sa genti, duncas iat lassau sa bidda a Giuanni De Sena, ma sa populatzioni po nexi de sa situatzioni econòmica pagu bella de is De Sena(s) iat incumentzau a si sperdi e dda iant secuestrada in su 1477. Is pagus bividoris abarraus nci fiant andaus a Nureci.
ATZENI – Bidda antiga de su Giudicau de Arbarei in sa Curadoria de Marmilla.
S'agatàt intra de Aressa e Sìmaba, in su sartu chi est immui est de Aressa.
Arrutu su Giudicau su Conti de Quirra dda boliat po sei ma su rei dda iat donada a Ramundu Moncada. Apustis de su 1450 su fèudu ddu iant secuestrau e sa famìllia Besalù ddu iat prima infeudau e acoa lassau a is Carroz, intrendi aici a fai parti de sa Contea de Quirra. In su 1724 is pagus bividoris abarraus de Atzeni nci fiant andaus a Aressa.
SERDIS DE MONTE - Bidda antiga de su Giudicau de Arbarei in sa Curadoria de Parte Montis. Fiat posta in su sartu chi immui est de Uras.
Iat inghitzau a si sperdi in sa segunda metadi de su sèculu XIV apustis sa pesta de su 1376 e aintru de su sèculu XV in bidda non ddui iat prus nemus.
SÈRTZELA – Bidda antiga de su Giudicau de Arbarei in sa Curadoria de Parte Montis. Fiat posta in su sartu chi immui est de Gonnostramatza. Arrutu su Giudicau de Arbarei nci dda iant posta in su 'Regnum Sardiniae'. In antis de su 1430 fiat me in is terras chi teniat in cojantza Eleonora Manrique candu s'est cojada cun Bertran Carroz e acoa fiat intrada a fai parti de sa contea de Quirra. Spèrdia custa sa bidda nci fiat passada a is Centelles, a is Borgia(s) e a is Català. In su setixentus sa bidda si fiat spèrdia. Abarrat a oi sa crèsia de Santu Pàulu, chi allogat apalas de s'altari una pedra in su muru cun sa scrita ”EL V DE ARBILI MDXV ESTI ISTADA ISFATTA SA VILA DE URAS DE MANU DE TURCUS E MORUS E FUDI CAPITANU DE MORUS BARBAROSSA”.
