S'Unioni Natzionali de is Pro Loco de Itàlia e ALI Làtziu – Autonomias Localis italianas, cun s'agiudu a manu de pari de su Tzentru Internatzionali “Eugenio Montale” ant bandiu sa de XII editzionis de su Prèmiu literàriu natzionali “Salva la tua lingua locale”.
Su prèmiu est abertu a totu is autoris in unu de is dialetus o lìnguas localis de Itàlia.
Su Prèmiu est a tema lìberu e est partziu in 8 setzionis:
-
Prèmiu “Tullio De Mauro” po traballus scientìficus giai imprentaus o mai imprentaus prima (sàgius, tesis de làurea, stùdius a pitzus de dialetus e/o lìnguas localis e ditzionàrius)
-
Poesia giai imprentada po lìburus giai imprentaus movendi de su 1 de gennàrgiu de su 2022
-
Prosa giai imprentada
-
Poesia mai imprentada, cun tradutzioni in lìngua italiana
-
Prosa mai imprentada, cun tradutzioni in lìngua italiana
-
Fumetu giai imprentau, cun tradutzioni in lìngua italiana
-
Teatru, po testus mai imprentaus o giai imprentaus cun tradutzioni in lìngua italiana
-
Mùsica po branus originalis o cantus popularis de sa traditzioni, cun tradutzioni in lìngua italiana
Si podit pigai parti a non prus de duas setzionis impari. Po ddu fai tocat a cumpilai su mollu de partecipatzioni e cunforma a sa setzioni seberada, auniri totu is informus o materiali chi serbit.
Is traballus depint arribai aintru e sena de sartai su 4 de cabudanni de su 2024 a s'indiritzu “Premio Salva la tua lingua” c/o UNPLI – Unioni Natzionali Pro Loco de Itàlia in pratza de Flavio Biondo, 13 in Roma.
Po totu is traballus giai imprentaus tocat de nci mandai finas su formau in .pdf. Una còpia de totu s'at a allogai in un'archiviu aposta de su Prèmiu in sa sea natzionali de s'UNPLI a Roma, a disponimentu de studiosus e cultoris de sa matèria.
In prus, is chi ant cuncordau su prèmiu ant pesau unu reconnoscimentu aposta in memòria de Luigi Manzi, poeta e scritori ma finas fundadori e abiatzadori de su Prèmiu. Su Prèmiu speciali “Luigi Manzi” at a andai a personalidadis chi traballant o ant traballau in campu culturali.
Sa Tzerimònia de premiatzioni s'at a fai in su mesi de idas a Roma in sa sala de sa Protomoteca in Campidoglio.
Po ndi sciri de prus bai a su giassu www.salvalatualingualocale.it
