Sa denominatzioni de orìgini proteta “Sardegna” est sceti po s’ollu ermanu extra-vèrgini bogau cunforma a critèrius e rechisius chi at stabilèssiu su Disciplinari po sa produtzioni sua.
Is matas de olia po fai s’ollu DOP “Sardegna” crescint agiomai in totu sa regioni e in sa Provìntzia de Aristanis me in is comunus de: Abbasanta, Aidumajore, Abas, Àllai, Arborea, Ardaule, Aristanis, Arriora, Arruinas, Assou, Asuni, Bàini, Boàtiri, Bobadri, Baressa, Bauladu, Bidoniu, Biddanoa Truschedu,Biddobrana, Bonàrcadu, Boroneddu, Busache, Crabas, Cùglieri, Crucuris, Fordongianus, Ilartzi, Gonnacodina, Gonnonò, Gonnostramatza, Masuddas, Marrùbiu, Milis, Mogoredda, Mòguru, Mragaxori, Narabùia, Neoneli, Norghiddo, Nughedu Santa ‘Itòria, Nurachi, Nureci, Ollasta, Ollastra, Prammas, Pau, Paulle, Pompu, Samugheo, Arcidanu, Santa Justa, Santu Lussurzu, Santeru, Iscanu, Sèdilo, Sèneghe, Senis, Sennariolo, Siamajore, Siamanna, Siapicia, Sìmaba, Simaghis, Sini, Siris, Soddie, Sabarussa, Sorradile, Tadasuni, Terraba, Tramatza, Tresnuraghes, Ula, Uras, Useddus, Sant’Antoni, Tzeddiani, Zrofolliu.
S’olia po fai s’ollu DOP “Sardegna” depit essi de su tipu Bosana, Tunda de Casteddu, Tunda de Biddacidru e Semidana (e is sinònimus insoru). S’olivàriu depit essi a arratza a sola o ammesturada, in ònnia modu s’ollu depit essi a su 80% de is arratzas arremonadas e s’àteru 20% de àtera calidadi chi nci at in su territòriu ma chi no inferrit is caraterìsticas chìmicas e organolèticas de su Disciplinari.
S’arregorta de s’olia si depit fai candu s’olia est cumprida, de candu incumintzat a coi finas a su 31 de gennàrgiu. Tocat a dda spibidai a manu o a ainas, ma in ònnia modu non fait a impreai tècnicas po ndi assoddiri s’olia giai arruta a terra de sei o prodotus po ndi dda fai arrui.
S’olia arregorta tocat de dda tragai e allogai in stèrgius stampaus po ddi fai pigai ària, in logu oprigau de s’àcua, bentu, cilixia, atesu de fragus malus, e tocat de dda mòliri aintru de 2 diis de s’arregorta.
Is molinus depint essi arreconnotus cunforma a sa normativa in vigori a arrui me in is comunus autorizaus a su DOP, sighendi su molìngiu aposta.
S’ollu ermanu DOP “Sardegna” depit portai custas caraterìsticas:
- acididadi in àcidu olèicu < 0,5%,
- nùmeru de peròssidus < 15,
- polifenolus totalis ppm > 100,
- tocoferolus ppm > 100,
- colori birdi chi tirat a su grogu chi mudat colori in su tempus,
- fragu de frutau,
- sabori de frutau cun àrviu de marigosu e de pitzianti.
Si podit ponni in cummèrciu in stèrgius o bulìllias chi non pigant prus de 5 lìturus.
Po ndi sciri de prus tocat a ligi su Disciplinari intreu de s’ollu ermanu DOP “Sardegna” chi s’aciapat in su giassu de su Cunsòtziu po sa tutela de s’ollu.
