Sa cotza, sa còciula bianca e sa còciula niedda de su Golfu de Aristanis funt Produtus Agroalimentaris Traditzionalis de Sardigna chi s’agatant cun produtzioni naturali in Marceddì, in su logu chi imprassat is stàinis de Santu Juanni e de Santa Maria, su stàini de Corru s’Itiri e su sprigu de àcua aintru a Capu Mannu, e a produtzioni e depuratzioni in impiantus a mari in su restu de su Golfu de Aristanis.
Sa cotza pigada in su Golfu est salida meda, a sabori durci ma chi lassat a ùrtimu unu pagu de marigosu in buca.
Siat sa còciula niedda che cussa bianca de Marceddì est salida meda, ma cun sabori e fragu tìpicu de s’àcua de Marceddì.
Sa còciula e sa cotza funt animalis a scròciu a duas perras, atacadas, in unu oru, in s’incàsciu, a papu atacau a su scròciu, cun una parti prus tostada chi si tzèrriat siddu. Candu est mesu aberta, bogat a foras lìngua e corrus (spècia de cannitu po suspiri o po s’atacai).
Siat sa còciula che sa cotza funt animalis “coladoris” duncas sunfrint de s’incuinamentu, po custa arraxoni candu s’àcua no est ossigenada o lìmpia beni, in antis de ddas bendi po papai s’arregollint in bartzas in s’àcua lìmpia po ddas spurgai. Una borta mesuraus is baloris chìmicus e microbiològicus in vigori si allogant in sachitas de arretza de plàstica cun eticheta e mandadas a bendi.
Sa còciula niedda de Marceddì praxit meda in continenti puru.
