Is anicinus funt arregistraus in sa scheda sua de is Produtus Agroalimentaris Traditzionalis de sa Regioni Sardigna cun is nòminis de “anicinus”, “anicinus sorresus” e “anicini di Sardegna”.
Seus chistionendi de unu durci a pistocu de forma allonghiada o de rombu, grussu prus o mancu 2 cm, tzacarradori, a colori de oru pru o mancu scuru a segunda de cantu est passau a forru.
Po fai s’impastu nci bolint:
- 600 gr de sìmbula fini
- 4 ous
- 250 gr de tzùcuru
- 100 gr de ollu de porcu
- 1 bustina de fermentu
- licori de ànici
- 1 cullera prena de matafaluga.
Tocat a traballai is ous cun su tzùcuru e su licori, finas a fai s’impastu spumosu, a bellu a bellu tocat a ddi aciungi sa sìmbula e s’ollu de porcu moddi e a sighiri su fermentu e sa matafaluga apustis de dda ai sciacuada, asciugada e passada in sa farra.
Candu s’impastu est traballau beni e fatu a totunu, si nci ghetat in una tèllia unta e agiudendi-sì cun is manus tocat de ddi donai forma de pani allonghiau, in una tèllia nci ndi at a capi prus de unu.
Acabbada sa cotura a forru calendi a 200-220° in 30 minutus, si lassat scidrai e una borta afitau a fitas de 2 cm si torrat a inforrai po ddi donai prus colori e po ddu fai prus àrridu.
In sa traditzioni sarda si faiant is anicinus po batiaris, cojas e comunionis.
Oindii a segunda de is gustus a bortas non si torrant a inforrai e intamis de s’ollu de porcu calincunu nci ponit su butirru,
Medas sciundint s’anicinu in sa malvasia o in su muscau.
