In sa scheda sceradora de is Produtus Traditzionalis de sa Regioni Sardigna s’arremonat finas cun su nòmini italianu de “colombelle”, tradutzioni scheta scheta de “caombas” fueddu chi ndi arribat de su latinu COLUMBUS, ma cun vocalismu italianu.
Seus chistionendi de unu tipu de pasta frisca e, mancu nau si bolit, a forma de culumbu, lada 2-3 cm e fata de sìmbula fini, àcua e sali.
Una borta fatu s’impastu, si sterrit a pillu fini (po su prus a tùturu), e si segat sa pasta a retàngulus, ladus 2 cm e longus 4 cm. S’oru de unu ladu longu s’asserretat a undas po formai is alas chi ndi essint apustis de ai spitzuau in su mesu de su ladu lisu po fai sa conca de sa caomba.
Is caombas si podint coxinai siat apena fatas o sinuncas apustis de ddas ai fatas asciutai, po su prus in tàulas de linna.
Custa pasta si fait po su prus a Pasca Manna, ghetada in brodu de petza, cun fitas de pani cocoi e asuba fenungheddu, ou e tzaferanu.
