Su pani de saba (arregistrau cun pani ‘e saba, pani saba) fait parti de sa categoria “Pasta frisca e produtus de paneteria, de pistocus, de ofelleria e cunfeteria” si fait in totu su territòriu sardu ma prus de totu in su Comunu de Sini, in Provìntzia de Aristanis.
Sa forma de su durci mudat de logu in logu, a bortas retangulari, a bortas tundu o a rombu. Unu pani pesat 200/300 gr ma cussu chi inforrant in Sini podit pesai de prus, de 1 kg a 4 kg, in prus su pani de saba de Sini est stampau in mesu, est totu afrorigiau a mèndula sperrada stichida asuba e apustis de ddu ai cotu a forru su pani si fait lùciu cun sa saba lìcuida.
Est unu durci de farra, fromentu, saba de mustu, pabassa e fruta a scròciu (po su prus nuxi). Is ingredientis, una borta pesaus, si traballant e si lassat axedai 8 oras in logu calendi prus de 20 gradus, sa cota si fait a forru sardu, elètricu o “rotor” a gasòliu, lassendi-ddu 40 minùtus a temperadura non tropu arta.
A Sini sa ritzeta de su pani ponit in contu de fai buddiri in antis sa saba cun mela o mela piròngia, còrgiu de aràngiu segau a fini a fini, fenungheddu de sartu. Sa parti prus lìcuida de sa saba serbit po sciundi su pani una borta inforrau. S’impastu ponit in contu pabassa, mèndula e farra in partis agualis, aciungendi su fromentu a parti. A s’impastu s’aciungit sa saba, còrgiu de limoni, matafaluga e pìbiri durci. Si lassat axedai 12 oras. Ònnia pani fatu si afrorigiat cun sa mèndula e s’inforrat una dexena de minutus, segundu a sa mannesa. Apustis cotu e scidrau si sciundit cun sa saba.
Su pani de saba est antigu meda. Acapiau a is festas de Totus is Santus e de Paschixedda.
In Sini si fait in beranu (e si faiat finas in su mesi de argiolas) e in ocasioni de sa festa de Santu Iroxi, su 23 de abrili.
Custa pràtiga est atestada finas de sa segundu metadi de su Setixentus, comenti testimòngiant is àutus allogaus in s’Archìviu de s’Obispu de Abas.
De su 1994 su pani de saba est su protagonista de sa sagra chi si fait sèmpiri su 25 de abrili in Sini.
