S’arratza de boi sarda-modicana est un’ammesturu intra de malloru de arratza Modicana (chi ndi est arribau de Sicìlia) e baca de arratza Sarda. Comintzat a nci essi in Montiferru de diora, in mesu a totu in Santu Lussurzu in su 1860.
Est un’arratza cun s’ìndula de su traballu, ma a dii de oi si pesat po su lati e po sa petza bella tantu de dda fai Produtu Agroalimentari Traditzionali de Sardigna.
S’arratza de boi s’imprestat a bivi a su passiu finas a totu annu. Pascit po su prus in pradus naturalis arricus de erba de ònnia arratza e custu ndi assegurat sa tipicidadi sua.
Candu su mandiari chi non si produxit in sienda no est bastanti, si podit coberai de siendas acanta o de atesu. Candu s’allevamentu ddu decrarant sanu arriciit spricullus veterinàrius de òbrigus o faculativus.
Is pegus chi si usant po afillai funt po su prus iscritus in s’albu genealògicu.
Is vitellus e is tràbilas chi non ndi arribant de àteru allevamentu de foras s’istintant prima e si bendint pagu apustis.
Si bocint me in is maceddus de sa zona autorizaus e arreconnotus de su Ministeru de sa Sanidadi.
Su territòriu chi pertocat sa produtzioni de custa petza imprassat is comunus de sa provìntzia de Aristanis a làcanas cun cussus de sa provìntzia de Nùgoro, in mesu a totu: Cùglieri, Bonàrcadu, Sèneghe, Narabùia, Sennarìolo, Tresnuraghes, Paulle, Bauladu, Iscanu, Santu Lussurzu, Sindia, Norghiddo, Abbasanta.
