Su corbu marinu (Phalacrocorax carbo, ma in Sardigna nci at de prus sa sutaspècia sinensis) est unu pilloni mannu de àcua (prus o mancu 90 cm), a colori nieddutzu e a bicu grogànciu, a canna, acancarronau in pitzu. Sa barba e is trempas funt a pinna fini bianca, asuba de sa conca portat unas cantu pinnas biancas. In s'istadi, candu est mannu de edadi, portat una mància bianca me in is còscias e me in partis bàscias de is fiancus mentras candu est giòvunu est a colori prus craru, chi tirat a su trinu, a gùturu e a brenti bianca. Candu si firmat in s'arroca abarrant stantàrgiu beni e a bortas a alas abertas.
Sendi pilloni de àcua est fitianu a ddu biri me in logu de costa, de stàini e de foxi e pagu bortas in logu de lagu, non ddi praxit s'àcua arta de mari o is logus ùmidus cun tupa de vegetatzioni. Papat pisci (e est po custu chi ddu timint is piscadoris) e si nci acabussat a s'àcua, 15-60 segundus, a non prus de tres metrus, nadendi abarrat a tzugu cìdriu e a bicu unu pagu furriau a susu. Sa pinna de is alas no apoderat ària e duncas si sciundit, arraxonis po chi su corbu marinu candu ndi essit de s'àcua abarrat a alas abertas po si podi asciutai.
Fait su niu in s'arroca de mari, me in is matas o inderetura in terra ammuntonendi fustigalla, erba, palla de mari o àtera pitzialla. Fait 3 o 4 ous.
Fait su niu meda in s'aristanesu.
Assìmbillat a su marangoni, chi ddi est parenti strintu e in medas pigant s'unu po s'àteru.
