Ollasta
In su territòriu de Ollasta agataus testimònius archeològicus medas. Tra custus arregordaus is nuraxis de Bìngias, Furisinu, Lea. Arrastus meda agataus fintzas de s'època romànica; ant bogau a pillu difati tumbas e frunimentus de mortu.
Assou
Sa bidda de Assou est connota po s'àrea archeològica de Santa Luxia. Sa cresiedda s'agatat prus o mancu a unu chilòmetru de sa bidda, est stètia torrada a fai bortas meda ma is istùdius narant ca sa primu borta ndi dd'iant pesada in su de VII sèculus.
A ingìriu de sa crèsia ddui at una àrea archeològica cun arrastus de edadi nuràgica e de su medioevu artu, cun testimònius de bias, domus, tumbas e putzus. No atesu meda si scerat unu nuraxi, in mesu a una biddixedda chi si spainat finas a sa crèsia.
Asuni
In Asuni agataus sa necròpoli de Burdaga; est fata de dexiaseti tumbas cun aposentus su prus de forma a retàngulu. Is tumbas, si scerat, ca sunt stètias imperadas che òprigu de is òminis e de is animalis. Presentant difati sinnus de su tempus e de sa manu de s'òmini; po nai medas de is portellus po serrai, ammancant.
A su logu fait a ddui lompi de sa biddixedda de Asuni, fadendi sa strada provinciali 38 po mesu chilòmetru. Su situ s'agatat a manu dereta.
