Santu Antoni Arruinas
Tra is tantis testimònius archeològicus chi agataus in sa bidda de Sant'Antoni Arruinas, ddui est su Menhir de Monti Corru Tundu. Custa perda arta arta de crobina trachìtica, si ndi strantaxat in mesu a unu paesàgiu collinari arricu de testimònius de su Neolìticu.
Est unu de is prus artus menhir de sa Sardigna, tirat difati 5 mèturus e 75.
Po lompi a sa localidadi de Monte Corru Tundu tocat a pigai sa bia de Felice Cau e sighiri po unu chilòmetru e mesu. Candu si arribat ainantis a unu cancellu, tocat a pigai sa bia a manu dereta; de inguni tocat a sighiri a pei finas a arribai a su menhir.
Crabas
Sa bidda de Crabas est arrica meda de testimònius de su tempus passau. Fueddaus innoi de su situ archeològicu de sa Osa, unu logu chi mancai no est nodidu che is àterus ma chi est de importu poita at permìtiu de connòsciri s'economia e su mandiari de cussu tempus.
S'insediamentu s'agatat acanta a su stainu de Crabas, in su setori setentrionali de su gulfu de Aristanis. Dd'ant agatau in su 2008, in s'interis de is traballus po fai sa strada provinciali noba tra Crabas e Aristanis. Funt bessius a pillus medas putzus e foradas.
In su putzzu N, ddui ant agatau aintru arrestus de pisci, e animalis de terra, arrogus de linna e ortigu, sèmini de àxina e meloni.
Làconi
In Làconi ddui at unu nuraxi spantosu, casi ca sa perda parit de colori azulu. Est ancora de cumprendi poita custa òpera tenit custa peculiaridadi. Si pensat ca iat a podi èssiri po sa presèntzia de pedralana (licheni)
Custu nuraxi si ndi strantaxat in una localidadi chi ddi narant Stunnu, prus a o mancu a dexi chilòmetrus foras de Làconi. Est fatu de tràchiti, cun brocus de manesa mèdia postus in filera.
Su chi abarrat de su nuraxi est artu prus o mancu doxi mèturus.
