Unu servìtziu telemàticu nou est ativu dae carchi chida e serbit a signalare sas telefonadas promotzionales infadosas. Est una prataforma chi s’agatat in su situ web de su Garante de sa protetzione de sos datos personales, est in càmbiu de sas signalatziones iscritas e apartenent a una sèrie de servìtzios ativados pro agiuare sa gente.
Su servìtziu si ponet a costàgiu de su Registru pùblicu de sas opositziones, chi est ativu dae s’istiu coladu e permitit a sos iscritos de torrare a nudda su cunsentimentu cuntzessu in antis, foras de su chi s’at a dare a pustis de s’iscritzione o cando b’apat cuntratu chi vìnculat. S’operadore devet abbaidare su Registru de sas opositziones in antis de fàghere sas telefonadas de publitzidade.
Su Garante racumandat de cumpilare bene sas signalatziones ca sas decraratziones farsas fatas a s’Autoridade si podent persighire a manera penale.
Su sistema non permitit de pònnere signalatziones genèricas. S’Autoridade no at a abbaidare sas signalatziones de telefonadas chi non si podent cullegare a atividades promotzionales o chi siant riferidas a chistiones foras dae su cuntestu de aplicatzione de sa disciplina in contu de protetzione de sos datos personales.
Pro tènnere àteras informatziones in contu de telemarketing si podet abbaidare sa setzione chi nde faeddat in su situ web de su Garante (https://www.gpdp.it/temi/telemarketing).
(GF.P.)
