Cras 25 de freàrgiu a sas 9 e mesa de mangianu in sa sala cunferèntzias Ascomfidi de Aristanis (carrera Sebastiano Satta, lotizatzione Cualbu) s’at a fàghere s’atopu-dibàtidu in contu de sanidade penitentziària.
S’atopu, propostu dae sa Càmera Penale de Aristanis e dae s’assòtziu Socialismo Diritti Riforme cun su patrotzìniu de s’Òrdine de sos Avocados, cheret fàghere una riflessione in contu de su sistema sanitàriu in sas presones.
Sa punna est de verificare comente est funtzionende sa sanidade in sas presones, bidu chi a pustis de sa pandemia sunt cambiadas cosas meda. Tocat a bìere si sos presoneris tenent garantidu su diritu a sa salude comente previdet s’artìculu 32 de sa Costitutzione.
Su presidente de s’Òrdine de sos Avocados de Aristanis, Enrico Meloni, at a fàghere su saludu de incomintzu e Maria Rosària Manconi (presidente de sa Càmera Penale) at a aviare sos traballos, coordinados dae Maria Grazia Caligaris referente pro sas presones de Socialismo Diritti Riforme.
Ant a intervènnere Carlo Dòria (assessore regionale de s’Igiene e Sanidade e de s’Assistèntzia Sotziale), Riccardo Curreli (diretore sanitàriu Residèntzia Esecutzione Mesuras de Seguresa), Marco Porcu e Luciano Fei (unu diretore e s’àteru coordinadore sanitàriu de sa Presone de Casteddu-Uta); Donatella Gallistru (esperta informàtica sanitària); Irene Testa (garante de sas persones privadas de libertade de sa Regione Sardigna).
Sunt invitados su provididore regionale de s’Amministratzione Penitentziària, sos diretores de sos istitutos e sos responsàbiles de s’àrea sanitària de Casteddu, Tàtari e Aristanis, sos rapresentantes de sos Tribunale de sorvelliàntzia de Casteddu e Tàtari, parlamentares, cussigeris regionales, avocados, esponentes de politzia penitentziària e garantes territoriales.
(GF.P.)
